Raj Mistry's world

Me,my stories and world around….


Leave a comment

આજકાલ-03/06/2020

સમય ખારા સમંદર ની ચમકતી રેત ની જેમ હાથમાં થી… આંખોમાં થી… શ્વાસો માં થી બસ સરકતો જ જાય છે…..સમય નું એક ધુમ્મીલ પ્રતિબિંબ આંખો ના ખૂણે થી થોડુંક થોડુંક ટપક્યાં કરે છે અને બસ ઈચ્છાઓ કહે છે કે સમય ન આ બુંદો ને પકડી લઉં…….!! પણ શક્ય છે ખરું?? જાને ભી દો યારો…….સમય વહેતો રહે એમાં જ સર્વ નું હિત છે…..! તો ચાલો એને વહેવા દો…. અને જોઈએ આજકાલ સમય કેવા રંગ દેખાડી રહ્યો છે??

  • સત્સંગ- સત્સંગ હમણાં ઓનલાઈન રસ્તે ધોધમાર વરસી રહ્યો છે…..જીવ ને શાંતિ મળે છે પણ વોહ બાત નહિ….!! જે પ્રત્યક્ષ નું સુખ છે….હરિ દર્શન, કથા વાર્તા કીર્તન, હરિભક્તો સંતો ના પ્રત્યક્ષ દર્શન નથી થતા અને જીવ નો એકાદ ખૂણો કોરોધાકોર રહી જાય છે……બસ સ્વામી શ્રીજી ને અંતર થી પ્રાર્થના કે – એક પળ ભી ન દૂર રહો હરિ…..!!!
  • કોરોના- મનુષ્ય જીવન ની …અને ખાસ કરી ને છેલ્લી એક શતાબ્દી ની ભયંકર વિડંબના ઓ પૈકી ની એક મહામારી ..કોરોના વાઇરસ સંક્રમણે સમગ્ર જગત ને બાન માં લીધું છે…..trillions of dollars નું નુકશાન….જગતભર ની ઇકોલોજી સુધરી છે તો ઇકોનોમી તળિયે બેસી ગઈ છે….કરોડો લોકો બેકાર થઈ ગયા છે…..તો લાખો લોકો પોતાનો દેહ છોડી ચુક્યા છે…….આવી ઘટના…આવો સમય તો મેં અને મારા જેવા અનેકો એ કદાચ પ્રથમવાર જ અનુભવ્યો છે…જોયો છે. મારી તો હોસ્પિટલ માં જોબ એટલે સજ્જડ લોકડાઉન વચ્ચે પણ ડ્યૂટી ચાલુ હતી……પણ લોકડાઉન નો સન્નાટો….અમદાવાદ ની સુમસામ સડકો ની ભેંકારતા પહેલી વાર જોઈ છે….! સદનસીબે , મારા ઘણા મિત્રો અને સગા.. કોરોના સામે ની લડાઈ માં હેમખેમ જીતી ગયા……પણ મનુષ્ય જાતિ માટે આ લડાઈ લાંબી ચાલવા ની….!! પોતાને સર્વ સમર્થ માનતો મનુષ્ય….મહાસત્તા ઓ એક વાઇરસ આગળ સાવ પામર લાગે છે……! કદાચ , આ પણ મનુષ્ય ના અહં ને તોડવા જરૂરી હતું જ…..!! જે થશે એ….હરિ ઈચ્છા બળવાન છે……એ જે કરશે એ સારા માટે જ હશે….!!
  • કુટુંબ- કોરોના ના બે માસ ચાલેલા લોક ડાઉન માં અમે અમારા પરિવાર ના બે મોભીઓ ને ટૂંકા સમય ગાળા માં જ ગુમાવ્યા…….! વડીલો ની ગેરહાજરી….પ્રસંગોપાત મન માં અચૂક અનુભવાય છે…..એમનો અનુભવ, એમનું માર્ગદર્શન….અરે એમની હાજરી માત્ર, તમને સામાજિક..પારિવારિક રીતે નિર્ભય…નચિંત કરે છે…..એમની આંખે આપણા મૂળિયાં અકબંધ દેખાય છે……એક પેઢી ને સમય ની સાથે ઢળતી જોવાનો રોમાંચ મળે છે…..નવી પેઢીઓ એ વડીલો ની આંગળી પકડી સમય ન વહેણ ને અનુભવે….એ રોમાંચ હવે છૂટતો જાય છે….!! વડીલો જેમ જેમ સમય ની રેત માં ડૂબતા જાય છે તેમ તેમ કુટુંબ પ્રથા….પરિવાર ને એક સૂત્ર માં બાંધતી કડીઓ વિખરાતી જાય છે..!!….બધાને “સ્વતંત્ર” રહેવું છે…..મન મરજી પ્રમાણે જીવવું છે…….એ ભાવ સપાટી બની સર્વ સબંધો…સયુંકત જીવન ના સુખ ને ફોલી ખાય છે અને પાછળ રહી જાય છે……ભયાવહ…..તપતપતી એકલતા….!!!! બધા એ વિચારવા નું છે કે સુખી કેમ રહેવાશે?? એકલતા સાથે કે સર્વ સાથે???
  • હરિકૃષ્ણ- અમારો હરિ તો સદાકાળ….નવપલ્લીત જ રહે છે….! જેમ જેમ એ વય માં વધતો જાય છે….તેમ તેમ તેના પ્રશ્નો….તેના તોફાનો….તેના પરાક્રમ વધતા જાય છે……..એની પણ મજા છે…….!! 😊😊 ઓનલાઈન સ્કૂલ કલાસીસ ના મજાક ને એ વેઠી રહ્યો છે અને અમારી કસોટી થઈ રહી છે…..! અને રોજ અવનવું એવું શીખી આવે છે કે અમુક વસ્તુઓ માં તો આપણે એની પાસે થી શીખવું પડે…..હાહાહા…!!
  • કેરી- મારી પ્રિય કેરી…આ વખતે કોરોના ના બહાના હેઠળ….એ મને દગો દઈ ગઈ….!! પૈસા ખર્ચે પણ સારી કેરી મળવી મુશ્કેલ થઈ ગઈ છે….છતાં ગાડું ધીમી ગતિ એ ગબડી રહ્યું છે….જોઈએ હજુ ચોમાસા માં 15 દિવસ બાકી છે….કેરી કેવો રંગ અને કેવો સ્વાદ કરાવે છે????
  • તો…બસ બધું સમય ન આ પ્રવાહ ને આધારિત છે….આપણે એમાં ભળી એ કે ન ભળીએ… પણ સમય ના એ વહેણ સાથે વહ્યા વગર છૂટકો ક્યાં છે….!!! તો બસ હૃદય માં એક હરિ ને રાખો…..દેહ ને પુરુષાર્થ ના શસ્ત્રો વડે સજ્જ કરી સમય સાથે વહેતા રહો….!! જીવન કદાચ એ જ છે….

    રાજ


    Leave a comment

    હરિઅનંતા… હરિ કથાઅનંતા…!

    અમે ગયા અઠવાડિયે સાસણ ગીર ફરી આવ્યા…ઢગલાબંધ અનુભવો થયા…હરીલીલા ઓ માણી….અને એક વાત ફરીથી સિદ્ધ થઈ કે  મારો હરિ મારા થી ય વધુ બોલકો છે…..એની વાતો સાંભળી ને લાગે કે હું જ જાણે મારા બાળપણ માં પાછો ફર્યો છું..!!!..કદાચ સમય ક્યાંય જતો નથી…એક પરિઘી માં ફરે છે…અને તમારું બાળપણ જ તમારા સંતાનો રૂપે પાછું ફરે છે અને ડંકા ની ચોટ પર કહે છે કે….હું શાશ્વત છું……!!

    જોઈએ એક સંવાદ……

    જૂનાગઢ મંદિર કોઠારી પૂ. ધર્મવિનય સ્વામી- ” હરિ…તારે મોટા થઈ ને શુ બનવું છે??”

    હરિ- સ્વામી…હું તો મોટો થઈ પહેલા ક્રિકેટર બનીશ….પછી સૈનિક બનીશ…પછી એન્જીનીયર…!!

    સ્વામી- અલ્યા…આટલું બધું…..??

    હરિ- હાસ્તો………!😊

    સ્વામી- અમારી જેમ સાધુ નથી બનવું??

    હરિ- ના….મારે તો સૈનિક બનવું છે…..!!

    સ્વામી ( હસતાં.. હસતાં) – તો તો તારે..તારા બદલામાં બીજા કોઈ ને સાધુ બનાવવા આપવો પડે….હો…! ના ચાલે…!.

    હરિ ( વિચાર કરતાં..) – સ્વામી….મારો ફ્રેન્ડ છે..ક્રિશ…… એને સ્વામી બનાવી દો….ચાલશે…!

    🤣🤣🤣🤣🤣😃😃😃


    હરિ અનંતા…. હરિ કથા અનંતા……!!!

    રાજ


    Leave a comment

    એક યાત્રા સાવજ ને નામ…..

    “એક યાત્રા સાવજ ને નામ…” …પોસ્ટ નું ટાઇટલ જોઈને ચમકી ગયા ને?? ભઈ…..ચમકી જ જવાય….કારણ કે- એમાં સાવજ છે……એ પણ ડાલમથ્થો…..! હાહાહા……હું વાત કરું છુ સમગ્ર એશિયા ખંડ ના એકમાત્ર સિંહ અભ્યારણ્ય- ગીર અભયારણ્ય ની…..! ઘણા વર્ષ થી ત્યાં જવાની ઈચ્છા હતી …..પણ મેળ ન પડ્યો…..ખુદ વનરાજ પણ એની પ્રતીક્ષા માં છેક ચોટીલા સુધી આવી ગયા……પણ અમારું સાવજ દર્શન નું તપ એ તપ જ રહ્યું…..છેવટે એ વર્ષો નું તપ…હવે સિદ્ધ થયું. અમારા સત્સંગી ..પરમ મિત્ર દ્વારા પ્રસ્તાવ આવ્યો…ઉત્તરાયણ ની રજાઓ ની અનુકૂળતા થઈ …પત્ની ની મંજૂરી મળી …અને છેવટે આયોજન બરોબર ગોઠવાયું. બે દિવસ નો પ્રવાસ- જેમાં ગોંડલ, સાસણ ગીર, સોમનાથ..જુનાગઢ નો પ્રવાસ ગોઠવાયો……તો સ્ટેપ બાય સ્ટેપ જોઈએ ..આયોજન અને અનુભવ…અને છેલ્લે વણમાગી “રાજ” સલાહો…….. 🙂

    • સૌપ્રથમ ઓનલાઈન સંશોધન શરૂ થયું…..ઘણીબધી વેબસાઈટસ છે..પણ સરકારની પોતાની સાઇટ્સ પર નજર નાખી…તમામ માહિતી ખંખોળી ને નક્કી કર્યું કે- સિંહ સફારી નું ઓનલાઈન બુકિંગ કરવામાં આવે……જંગલમાં જ હોય- તેવા સસ્તા..સારા…જમવામાં સાનુકૂળ હોય એવા રિસોર્ટ્સ માં રહેવું……
    • સફારી માટે- આમાં બે વિકલ્પ છે ..1) એકાદ કલાક ની ટૂંકી સફારી (જે દેવળીયા કરી ને સાસણ ગીર નો ભાગ છે ત્યાં થી ઉપડે- અને બસ અથવા જિપ્સી માં જઇ શકાય) 2) બે ત્રણ કલાક ની લાંબી સફારી…જે ગીર ના સિંહ સદન થી ઉપડે અને ખુલ્લી જિપ્સી માં લઈ જાય…..હવે આ બે ઓપ્શન માં ટ્રીક છે……પહેલા વિકલ્પ માં – બસ સસ્તી અને સારી પડે – 150 થી 190 રૂપિયા માં પ્રતિ વ્યક્તિ એ પૂરું થઈ જાય જ્યારે જિપ્સી માં 6-7 વ્યક્તિ વચ્ચે 3500-4000 રૂપિયા નો ખર્ચ થાય……બીજા વિકલ્પ માં લાંબી સફારી જેને વાઇલ્ડ લાઈફ માં રસ હોય…તેના માટે સારી….કારણ કે એમાં સિંહ દેખાય પણ ખરો અને ન પણ દેખાય…..જ્યારે કલાક ની યાત્રા માં – ટ્રેકર્સ ની મદદ થી સિંહ, દીપડા,હરણ,નીલગાય,શિયાળ..બધુ જ દેખાડે……અને અમે એટ્લે જ બસ માં ગયા….અને બધા ના દર્શન નો લાભ લીધો……હરિ ને તો જલ્સા જ પડી ગયા……!!

    IMG_20200114_134031

    • બસ ની સફારી કલાક ની હોય આથી ઓનલાઈન બુક કરાવો કે ત્યાં દેવળીયા જઈ ને ટિકિટ લો તોપણ ચાલે…..જ્યારે બે ત્રણ કલાક ની સફારી માટે – ઇચ્છિત સમય માટે એડવાન્સ બુકિંગ કરાવવું સારું……ઓનલાઈન બધી જ સગવડ છે…..બસ થોડુક કષ્ટ લો……નિયમો વાંચો અને આગળ વધો…

    • એ જ રીતે સાસણ ગીર માં ઢગલાબંધ હોટલ્સ, રિસોર્ટ્સ અને ફાર્મ હાઉસ છે……નેટ અને મિત્રો ના અનુભવ થી ..સલાહ થી અમે ફાર્મ હાઉસ પસંદ કર્યું- જે એકદમ શાંત…ભોજદે ગામ નજીક ..નદી કિનારે હતું…..રહેવાનુ એકદમ શાંત….જમવાનું એકદમ ઘર જેવુ શુદ્ધ દેશી ….અસલ કાઠિયાવાડી…! સ્વિમિંગ પુલ..કેમ્પ ફાયર ની સગવડ પણ હતી…..હરિએ તો જલ્સા થી એનો લાભ લીધો…..!! તમે પણ બધી તપાસ કરી ને એનો લાભ લઈ શકો……અમે રાત્રે દેશી જમણ નો લાભ લીધા પછી અદ્ભુત કેમ્પ ફાયર અર્થાત તાપણી નો લાભ લીધો…..ફાર્મ હાઉસ માં- કેસર કેરી ના આંબાવાડી માં – અમારી રમ થી થોડેક જ દૂર -શિયાળ ને ફરતા પણ જોયા….અને તપાસ કરતાં જાણવા મળ્યું કે- જો અહી શિયાળ આવી શકતા હોય તો- સિંહ પણ આવી શકે…!!! ઑ બાપ રે…!!

    • અઢળક ઠંડી માં લાભ લઈ અમે- સવારે શાંતિ થી ઉઠ્યા….પેટભરી ને નાસ્તો કરી સોમનાથ જવા રવાના થયા….માત્ર 35-40 કિમી દૂર છે……ત્યાં પહોંચ્યા અને મંદિર નો નજારો જોઈ ખુશખુશાલ થઈ ગયા…જેનો હજારો વર્ષ નો ઇતિહાસ છે….અનેકો વખત વિધવંશ થયું છે….હજારો લોકો એ જેના માટે પોતાની આહુતિ આપી છે……તેના મહિમા નું શુ ગાન કરીએ!! અદ્ભુત સમુદ્ર કિનારો….મસ્ત ઠંડી નો માહોલ અને જ્યોતિર્લીંગ ની સાક્ષાતતા નો અનુભવ..!!! અદ્ભુત…..અદ્ભુત…! સોમનાથ મંદિર ની સામે જ એક નાનું મંદિર છે- જે મૂળભૂત જૂનું મંદિર કહેવાય છે- તેમાં પણ દર્શન નો લાભ લીધો………એ પછી મંદિર ની પાછળ જ આવેલા કોકિલાબેન ધીરુભાઈ અંબાણી ના યાત્રી ભવન માં પંજાબી જમણ નો લાભ લઈ – સોમનાથ મ્યુજીયમ જોવા ગયા પણ બુધવારે રજા હતી એથી ધક્કો પડ્યો …પછી તો સોમનાથ ના પ્રખ્યાત સ્થળો ની મુલાકાત લેવા છકડા રિક્ષા ને ભાડે કરી….350-400 રૂપિયા ના ભાડા માં- બાણ ગંગેશ્વર મહાદેવ( દરિયા કિનારે છે) , ભાલકા તીર્થ, ત્રિવેણી સંગમ, પાંડવ મંદિર, સૂર્ય મંદિર, રામ મંદિર અને સમુદ્ર ચોપાટી નો લાભ લીધો……દરિયો કિનારો સારો છે…….તમે ત્યાં ઊંટ ની સવારી, ઘોડે સવારી, બોટિંગ નો લાભ લીધો……ઢગલાબંધ ફોટા લીધા છે….જેને મિત્રો સાથે વહેંચવામાં આવ્યા છે……

    ત્રિવેણી સંગમ…

    • યાત્રામાં આ દેહ ના રંજન ની સાથે જીવનું સુખ પણ જોવું પડે ને…!! તો અમે જ્યારે રાત્રે ઘરે થી નીકળ્યા ત્યારે સૌપ્રથમ વહેલી સવારે ગોંડલ અક્ષર મંદિર પહોંચી ગયા…..સ્નાનાદિક ,પુજા કરી ને અક્ષર ડેરી એ સ્વયં અનાદિ મૂળ અક્ષર ગુણાતીતાનંદ સ્વામી દ્વારા પૂજિત હરિકૃષ્ણ મહારાજ ના કેસર જળ દ્વારા અભિષેક નો લાભ લીધો….પ્રદક્ષિણા કરી…..મહાપૂજા નો લાભ લીધો અને ઉપર ઘનશ્યામ મહારાજ ની મંગળા આરતી નો અદ્ભુત લાભ મળ્યો…..!! અદ્ભુત અદ્ભુત…….! ત્યારબાદ , નાની બજાર માં આવેલા જૂના સ્વામિનારાયણ મંદિર કે જ્યાં ગુણાતીતાનંદ સ્વામિ એ દેહત્યાગ કર્યો હતો- તેના દર્શન કર્યા…..અને પછી સોમનાથ મહાદેવ ના દર્શન…વળતી વખતે- જુનાગઢ મંદિર માં ઠાકોરજી ની શયન આરતી નો અદ્ભુત લાભ મળ્યો…..! એકદમ શાંત ..શીતળ વાતાવરણ અને શયન આરતી ના પદો ની હુંફ………ખરેખર અવિસ્મરણીય લાભ મળ્યો..!!!

    તો- અમારી યાત્રા બે દિવસ ની હતી પણ અદ્ભુત હતી…..રસપ્રદ હતી……તન મન ને પ્રફુલ્લિત કરનારી હતી……..

    તો ચાલો માણીએ મારી વણમાગી સલાહો…….

    • સાસણ ગીર નો આ પ્રવાસ – જીવન માં એકવાર તો અચૂક કરવો….પણ પૂરતો સમય લઈને જવું……અમદાવાદ થી સાસણ ગીર પહોંચતા 6-7 કલાક લાગે- વળી રાજકોટ હાઇવે પર અત્યારે કામ ચાલે છે તેથી યાત્રા થોડીક ધીમી થાય……પણ સાસણ ગીર નો પ્રવાસ કરવો હોય- કુદરત ને મનમૂકી ને માણવી હોય તો- ઓછામાં ઓછા બે ત્રણ દિવસ ત્યાં- જંગલમાં ફાર્મ હાઉસ માં રોકાવાય તેવું કરવું…..સારો કેમેરો પાસે રાખવો…..ઠંડી ની ઋતુ માં જ જવું……ઉનાળા માં કાળજાળ ગરમી માં અહી સફારી કરવી શાણપણ ભર્યું નથી……..બસ માં સફારી કરવી- એ મારા મતે યોગ્ય વિકલ્પ છે…..બાકી જિપ્સી પણ સારી જ છે….પણ મોંઘી લાગી શકે…..
    • સાસણ ગીર થી સોમનાથ, દીવ નજીક પડે…….સોમનાથ માં રાત્રે લેસર લાઇટ શો થાય છે……ત્યાં રોકાવા ના અઢળક વિકલ્પ છે……..અંબાણી પરિવાર દ્વારા નિર્મિત ગેસ્ટ હાઉસ પણ છે…….
    • સોમનાથ માં આખો દિવસ જાય એટલા બધા જોવાલાયક સ્થળ છે……રિક્ષામાં જ ફરવું…..એમાં પણ ત્રિવેણી સંગમ માં અત્યારે સાયબેરિયા ના પક્ષીઓ આવ્યા હોય છે…….કપિલા, હિરણ અને સરસ્વતી નદી નો સંગમ…….પાસે જ શ્રીકૃશ્ન ભગવાન ના અંતિમ સંસ્કાર થયા હતા એ સ્થળ……અદ્ભુત જગ્યા છે…….લિસ્ટ લાંબુ છે……..આથી સમય પૂરતો લઈને જાવું…….ચોપાટી પ્રમાણ માં ચોખ્ખી છે……સાંજ નો નજારો અદ્ભુત હોય છે…..આથી એ સમયે જાઓ તો ખૂબ મજા આવશે…..
    • યાત્રા લાંબી છે…..આથી આયોજન એ મુજબ કરવું…….અહી થી દીવ જઈ શકાય …..અમદાવાદ પરત આવતી વખતે રસ્તા માં જેતપુર આવે..જુનાગઢ પણ આવે……જુનાગઢ માં પણ અઢળક જોવાલાયક સ્થળ છે…….જેનો લાભ લઈ શકાય…..

    તો- ટૂંક માં મન હોય તો સાસણ ગીર જવાય…..બધે જવાય…..અને લાભ લેવાય…..! બોલો ..તમે શું કહો છો???

    બસ- ફરતા રહો……કારણ કે ચાલતા રહેવું એ જ જીવન છે……..!

    રાજ


    Leave a comment

    રેવા ને કિનારે કિનારે…..

    ઘણીવાર આપણે અતિ કઠિન એવી રેવા નદી કે નર્મદા ની પરિક્રમા વિષે સાંભળીએ છીએ….સાક્ષર અમૃતલાલ વેગડ ના પુસ્તકમાં વાંચીએ છીએ….પણ અહી નર્મદા મૈયા ની પરિક્રમા ની વાત નથી….કારણ કે આપણે એ લાયક નથી….છેક પુરાણો માં પોતાની હાજરી પુરાવી ચૂકેલી આ એકમાત્ર નદી ની પરિક્રમા એના મહિમા જેટલી જ સર્વોપરી છે…..છતાં સંસાર ના ખડકાળ સ્થિતિ ઓ માં ફસાયેલા આ જીવ માટે લગભગ 1312 કિમી ની ત્રણ વર્ષ થી વધુ સમય માં પાર થતી આ પરિક્રમા આ જીવન માં તો શક્ય નથી જ ….! છતાં અમદાવાદ ની સરહદ પર લહેરાતી વિશાળ કેનાલો જોઈને – નર્મદા મૈયા ના ખોળામાં કમસેક્મ ડૂબકી લગાવવા ની ઈચ્છા તો થઈ જ જાય છે……..

    જીવન માં આ શુભ ઘડી ક્યારે આવે? તેની પ્રતિક્ષા હતી અને હરિ દયા એ ઘડી આ શરદ પુર્ણિમા એ…ગુણાતીત પ્રાગટ્ય દિવસે ગોઠવાઈ……પરિવાર ના વડીલ બંધુઓ એ આયોજન કર્યું અને અમે સૌ રાત્રિ ના અંધારા ને ચીરી ને બસ ના ખોળા માં ગોઠવાઈ ગયા……હેતુ હતો માં રેવા ને કિનારે ભારત ના ગૌરવ એવા સરદાર પટેલ ની જગ વિખ્યાત સૌથી ઊંચી પ્રતિમા ના દર્શન મુલાકાત કરવી…..એની નજીક આવેલા ધરખડી અભયારણ્ય અને ઝરવાણી ધોધ ની મુલાકાત લેવી….સમય વધે તો નીલકંઠ ધામ પોઇચા અને કુબેર ભંડારી મંદિર ની પણ દર્શન મુલાકાત લેવી…..

    સમય નક્કી થયો રાત્રી ના બે વાગ્યા નો…..થોડોક વહેલો હતો પણ જરૂરી હતો….કારણ કે પરિવાર ને અલગ અલગ સ્થળો થી એકત્રિત કરવા નો હતો….તો છેવટે અમારી સવારી ઉપડી….રોડ સારો હતો….અને સૌપ્રથમ અમે પહોંચ્યા ઝરવાણી ધોધ ..જે ધરખડી અભયારણ્ય માં સ્થિત છે….તમે કાર ,બસ છેક અંદર લઈ ને જઇ શકો છો….એન્ટ્રી ચાર્જ લાગે, પણ અંદર નો માહોલ જોઈ ખુશ થઈ જવાય એવું છે…..ચોમાસા માં જ સક્રિય થતા આ ધોધ નું અત્યારે રી ડેવલોપમેન્ટ ચાલી રહ્યું છે, આથી ધોધ સુધી પહોંચવા ચાલવું પડે….નાના ઝરણાં ને ઓળંગવા પડે….અને લગભગ 15 મિનિટ પછી તમે તયાં પહોંચી શકો…..ત્યાં પહોન્ચો એટલે મહેનત વસૂલ થઈ જાય….! અદભુત નજારો….અને અમે સસવારે 8 વાગ્યા ની આસપાસ ત્યાં પહોંચ્યા હતા એઆથી અમારા સિવાય ત્યાં કોઈ જ ન હતું…એક આઆદિવાસી છોકરી અમને ધોધ સુધી દોરી ગઈ …બધા એ ખૂબ જ મજા માણી….હરિ તો કપડાં બદલ્યા વગર જ કુદી પડ્યો….હાહાહા….!!

    અમારા ટુર ઓપરેટરે ગરમાગરમ નાસ્તો બનાવી રરાખ્યો હતો…બધા ને ખૂબ ભૂખ લાગી હતી આથી મન મૂકી ને તૂટી પડ્યા….! હું ગયા પ્રવાસ ની જેમ આ વખતે પણ, હરી ના ચપ્પલ ને લેવા જતા લપસી પડ્યો અને એક ધારદાર પથ્થર મારા હાથ માં ઘૂસી ગયો… લોહી ચાલુ થઈ ગયું પણ જાણે શ્રીજી એ સહાય મોકલી હોય તેમ એક 108 એમ્બ્યુલન્સ ત્યાં થી પસાર થતી હતી અને મને પ્રાથમિક સારવાર મળી ગઈ…!!

    છેવટે નાસ્તો કરી અમારું ગ્રૂપ Statue of Unity પહોંચ્યું… એડવાંસ માં ટિકિટ બુક થાય છે આથી અમને રવિવાર હોવા છતાં બહું ભીડ નો સામનો કરવો ન પડ્યો અને પાર્કિંગ માં થી જ દુનિયા ની સૌથી ઊંચી પ્રતિમા જોઈ મસ્તક ગર્વ થી ઊંચું થઈ ગયું…..!! નરેન્દ્ર મોદી ની દૂરંદેશી… રાષ્ટ્ર ભક્તિ… દેશ ને જગતગુરુ બનાવવા ના સર્વોપરી પ્રયાસ ને કોટી દંડવત કરવા ઘટે….!!! થોડુક ચાલવું પડે પણ એ પછી ઠેર ઠેર સલામતી વ્યવસ્થા… વ્હીલચેર અને એસ્કેલેટર ની સુવિધા… એક્દમ સ્વચ્છ અને આધુનિક વોશરૂમ અને પીવાના પાણી ની વ્યવસ્થા… ખૂબ જ સહયોગી કર્મચારીઓ અને ઠેર ઠેર ફ્રિ બસ સેવા….!!! ખરેખર અદ્ભુત હતા… બાકી સરકારી તંત્ર પાસે આટલી બધી અપેક્ષા ન રખાય…. 😀બસ એક વાત ખૂંચી…. સ્ટોર માં ટી શર્ટ ખૂબ જ મોંઘી હતી….!

    મે ફ્રિ બસ સર્વિસ માં સરદાર સરોવર ડેમ અને ફ્લાવર વેલી જોવા ગયા.. જ્યાં હજુ કામ ચાલુ છે અને મારું માનવું છે કે, બે વર્ષ પછી આ સમગ્ર વિસ્તાર ધમધમતો હશે… નવું પ્રાણી સંગ્રહાલય પણ બને છે… હેલિકોપ્ટર સેવા બંધ છે….rafting ચાલુ છે…..સાંજે અદ્ભુત લેસર શો થાય છે પણ એ અમારા પ્લાન માં ન હતું એથી છોડવું પડયું…

    એક સજેશન… SOU આવવું હોય તો ચોમાસા પછી ઠંડક થાય ત્યારે જ આવવું… બાકી ગરમી અહીં જાલીમ પડે છે….!!

    જમવા નુ તૈયાર હતું… આથી પેટપુજા કરી થોડોક આરામ કરી પોઈચા નિલકંઠ ધામ જવા નીકળ્યા… ત્યાં થી બે એક કલાક નો રસ્તો છે….. નર્મદા નદી ના વિશાળ પટ ને કિનારે સ્થિત આ વિશાળ મંદિર પરિસર ખૂબ જ સુંદર છે… અમે પહોંચ્યા ત્યારે શ્રીજી ની ઢોલ નગારા સાથે હાથી ની સવારી નીકળી હતી…. અદ્ભુત સવારી….!! સર્વ દેવો.. અવતારો ની સ્થાપના અહીં થઇ છે…. શ્રીજી ની મૂર્તિ દક્ષિણ ભારત પદ્ધતિ થી અલંકૃત છે …. બેઠેલી મુદ્રા અદ્ભુત છે…

    દર્શન, કોફી નાસ્તો કરી મા નર્મદા ને પાર કરવા બોટ ભાડે કરી….. નિલકંઠ ધામ ના સામે ના કિનારે જ કુબેરેશ્વર મહાદેવ નું પ્રાચીન મંદિર છે… એની નજીક માં જ નારાયણ બલી માટે જાણીતું ચાંણોદ છે….. નદી નો પટ એટલો વિશાળ કે બોટ માં એક કિનારે થી બીજે કિનારે પહોંચતા 15 થી 20 મિનિટ થાય…. કુબેર ભંડારી નો કિનારો ઉંચો છે અને સીડી ઓ સીધી છે… જેના પગે પ્રશ્ન હોય.. તેના માટે આ સ્થળ નથી…. ત્યાં થી નિલકંઠ ધામ પરત આવવા નીકળ્યા ત્યારે અંધારું નદી ના પટ ને ઘેરી વળ્યું હતું અને ક્ષિતિજ પર શરદ પુનમ નો પૂર્ણ ચંદ્ર ખીલી ઊઠ્યો હતો…. મા રેવા ના પ્રવાહ પર એનું ચમકતું પ્રતિબિંબ મને અક્ષરબ્રહમ ગુણાતીંતાનંદ સ્વામી ના મહિમા ની સ્મૃતિ કરાવતી ગઈ….. આજે એ ધન્ય ઘડી ની સ્મૃતિ સભા હતી અને હું એમાં ન હતો…!!

    છેવટે નિલકંઠ ધામ પરત આવ્યા અને જમવાનું તૈયાર હતું… ઉજાગરો અને થાક જોડે હતા આથી બધું ફટાફટ પુરુ કરી બસ ને ઘર તરફ ભગાવી…!

    તો અમે મા રેવા ને કિનારે યાત્રા ને માણી…. એ પર થી કોઈને અમારા અનુભવ ને આધારે આવી યાત્રા કરવી હોય તો મારા સુચન.. વણ માગી સલાહો… 🤓

    • Planning – એવી રીતે કરવું કે ઉજાગરા ન થાય…. ઉજાગરા યાત્રા ની મજા ને મારી નાખે છે…. SOU અમદાવાદ થી 200-220 કીમી થાય આથી ત્રણ ચાર કલાક થાય… સવારે 9 વાગ્યે તમે ત્યાં પહોંચો તો પૂરતું છે….. સાથે સૂકો નાસ્તો, ભરપૂર પાણી, પ્રાથમિક સારવાર (જો નદી, ધોધ જવા ના હો) તો સાથે રાખવા…. ધરખડી અભ્યારણ્ય માં એંટ્રી ચાર્જ 400 રૂપિયા થી શરૂ થઈ 3000 સુધી છે….. નર્મદા નદી માં બોટીંગ ના 1200-1500 થાય છે……. જેવી જેવી સંખ્યા…! સાંજનો લેસર શો સારો હોય છે…. એ પ્રમાણે આયોજન થઈ શકે…. અમદાવાદ રાણીપ બસ સ્ટોપ થી રોજ એસી બસ સવારે 6 વાગે ઉપડે છે…. તેનો લાભ લઈ શકાય….
    • Food – SOU માં કેફેટેરિયા છે…. ભાવ એ મુજબ છે…. પોઈચા માં તો જલસા છે…. કોઈ ચિંતા નહી…. કોઈ સારી હોટલ ત્યાં નથી… આથી આયોજન એ મુજબ કરવુ.
    • Expenses – સસ્તું ભાડું… અને સિદ્ધપુર ની યાત્રા જેવું છે….. અમારે 1500 રૂપિયા પ્રતિ વ્યક્તિ નો ખર્ચ હતો જેમાં – સવારે નાસ્તો, બપોરે સાંજે જમવાનું,પ્રદર્શન ટિકિટ (380rs) અને ઉપરોકત ચાર સ્થળ… બધુ આવી ગયું….. ધરખડી અભ્યારણ્ય નો ખર્ચ, બોટીંગ, rafting બધું આપણા માથે હોય… માટે ખર્ચ એ મુજબ પ્લાન કરવું.

    તો… હૈયા માં હામ ભરી, હરિ ને જીવમાં રાખી નીકળી પડવું….. એની રચેલી સૃષ્ટિ અદભુત છે…. મન ભરી ને માણવા જેવી છે…… જીવન ને બંધિયાર ન કરવું…. છેવટે સાધુ હો કે સંસારી…. સબ ચલતા હી ભલા…!!!

    રાજી રહેજો….

    રાજ


    Leave a comment

    આજકાલ-૧૪/૦૯/૨૦૧૯

    છેલ્લાં ઘણા સમય થી હુ “સમય” ની તલાશ માં હતો કે…..આજકાલ ને શબ્દો માં ઢાળી શકુ…..અને આજે એ માટે સમય મળી ગયો…..તો શુ ચાલે છે….આજકાલ???

    • છેલ્લાં એક બે અઠવાડિયા ભાગમ ભાગી માં ગયા……શ્રાવણ માસ પૂરો થયો અને જીવ નું લક્ષ સહેજ બદલાયું……પોળો , ગઢડા…સારંગપુર નું યાત્રાઓ થઈ……. અદ્ભૂત લાભ મળ્યો જે એનાં માટે વેઠેલા થાક થી અધિક ગણો હતો…….
    • પોળો તો હુ અનેક વાર ગયેલો છું પણ સત્સંગ પરિવાર સાથે પ્રથમ વાર જ ત્યાં ગયા….હિંમતનગર મંદિરે ઉકાળા પાણી કરી…પોળો પહોંચ્યા તો ઇડર આગળ ધોધમાર વરસાદ…..પણ પોળો માં પહોંચ્યા તો તડકો નીકળ્યો….સખત બફારો…..પણ ત્યાં વનરાજી એવી કે બધાં ખુશ થઈ ગયા….પ્રમાણ માં ત્યાં વરસાદ ઓછો છે આથી જેવું પાણી માં મોજમજા કરવા નું બધાએ વિચાર્યું હતુ…એવું ન થયુ…..છેવટે એક જગ્યા એ થોડુંક સ્વચ્છ પાણી હતુ….બધા તુટી પડ્યા અને કલાક બે કલાક સુધી અઢળક લ્હાવો લુંટ્યો……. એક મિત્ર નાં રિસોર્ટ માં દાળ બાટી બનાવડાવી હતી….તેનો પણ ખૂબ લાભ લીધો….વળતી વખતે વિરેશ્વર મહાદેવ નો લાભ લીધો….મસ્ત વહેતું ઠંડું પાણી અને છેવટે હિંમતનગર મંદીર માં રવિસભા નો લાભ લઈ… પરત આવ્યાં…!! ખૂબ મજા આવી….હવે તો ત્યાં રાત્રે રોકાવાય એમ જાવું છે……

    • સારંગપુર, ગઢડા ની યાત્રા નો અચાનક જ મેળ પડી ગયો…. જળ ઝીલણી નો ઉત્સવ હતો અને સોમ મંગળ રિના અને હરિ ને રજા હતી….પછી આવો લાભ જતો કરાય?? અમારી ગાડી નીકળી પડી…..બગોદરા ચોકડી સુધી સાવ ભંગાર રોડ ને હિંમત પૂર્વક પાર કરી, બોટાદ હાઇવે પર ચડી ગયા….ત્યાં રોડ પ્રમાણ માં ઘણો સારો છે….વરસાદ બંધ હતો આથી શાંતિ રહી….. સારંગપુર તો હમેંશા મારી પસંદગી નું સ્થાન રહ્યુ છે…આથી તેં પ્રત્યે વિશેષ ભાવ રહે એ સ્વાભાવિક જ છે……એ જ દિવસે સુદ દશમ હતી અને સદ્ગુરુ સંતો… મોટેરા સંતો ની હાજરી માં બ્રહ્મ સ્વરુપ પ્રમુખ સ્વામી મહારાજ નાં સ્મૃતિ સ્થાને સમુહ આરતી નો અદ્ભૂત લાભ મળ્યો…..!! અને બીજા દિવસે જળઝીલણી એકાદશી…નિર્જળા એકાદશી ની મહાપુજા નો લાભ મળ્યો…..ટ્રેક્ટર માં બેસી ને યજ્ઞ પુરુષ ડેમ પર ઠાકોરજી ને જળ વિહાર કરતાં નિહાળવા નો લાભ મળ્યો……! નિર્જળા હતી આથી ખાવા પીવા નું તો હતુ નહીં….આથી અમે ગઢડા પહોંચ્યા….રસ્તા માં બારે મેઘ ખાંગા થયાં….આગળ દેખાય નહીં તેવો વરસાદ ….પણ શ્રીજી દયા એ કોઈ વિઘન ન નડયુ અને સબ સલામત ગઢડા મહાતીર્થ સ્થાને પહોંચ્યા….ઉતારા લીધાં….અને સંપુર્ણ સંગેમરમર થી રચિત અદ્ભૂત મંદીર નાં …ઠાકોરજી નાં દર્શન કર્યા…..! ત્યાં પણ જળ ઝીલણી ઉત્સવ નો સહજ લાભ મળ્યો….હરિ ને તો આરતી નો લાભ મળ્યો એટ્લે રાજી રાજી થઈ ગયો……. અને અમારી એકાદશી સફળ થઈ ગઇ…..!! એ જ રાત્રે ધોધમાર વરસાદ ને લીધે લીસી થઈ ગયેલી સીડી પર થી હુ પડ્યો….અને કોણી ને ભાગે સારુ એવું વાગ્યું…જેનો સોજો હજુ પણ છે…..આથી એક હાથે જ ગાડી ચલાવી બીજે દિવસે, જુના મંદિરે….અક્ષર ઓરડી…દાદા ખાચર નો દરબાર….શ્રીજી અને સંતો જયાં સ્નાન કરવા જતા હતાં એ સહસ્ત્ર ધારા નાં દર્શને ગયા……સહસ્ત્ર ધારા ગઢડા થી લગભગ 8-9 કિમિ દુર છે….શાંત સ્થળ…નાના નાના ઘેલા નદી નાં પાણી નાં અનેક ધોધ…..પણ ત્યાં આપણાં થી તરવા પડાય એવું નથી….કારણ કે પાણી ઊંડું..ખડકો અંદર થી પોલા છે…જીવ નું જોખમ છે…..પણ સ્થળ ખરેખર દર્શનીય છે…..સાંજે ઝરમર વરસતા વરસાદ વચ્ચે નીકળ્યા…..ચંદ્ર ની સપાટી નો ….અમદાવાદી બોગસ..ભારેખમ ટ્રાફિક નો સામનો કરી ઘરે આવ્યાં ત્યારે જીવ માં જીવ આવ્યો….!!

    • યાર…..સરકાર લોકો નાં જીવ ની પરવા કરે, એ વખાણ યોગ્ય જ છે…..પણ આ તૂટેલા રોડ….અસહ્ય ટ્રાફિક….એમાં સુધારો કોણ કરશે??? સૌથી વધારે અકસ્માત તો એનાં થી જ થાય છે…….હવે તો અમદાવાદ નાં અમુક વિસ્તાર અને હાઇવે પર ગાડી લઇ ને નીકળવું હોય તો જીવ કચવાય છે……મગજ છટકે છે…!!!
    • મોરારી બાપુ- નીલકંઠ અભિષેક વિવાદ– આ વિવાદ એ મોરારી બાપુ ની સ્વામિનારાયણ સંપ્રદાય વિશે ની નરી અજ્ઞાનતા નું જ પરિણામ છે….અને વળી એમાં ઘણા દ્વેષિ… ઈર્ષાળુ….ટૂંકી બુદ્ધિનાં…અણસમજ લોકો ભળ્યા….. અને વિવાદ ચાલુ થયો……મોરારી બાપુ નાં જે અંગત કારણ કે માન્યતા ઓ જે હોય તેં….પણ એમને baps તરફ થી પુ. અક્ષર વત્સલ સ્વામી દ્રારા ઊંડાણ પૂર્વક…સંયમિત રીતે ઉત્તર મળી ગયો છે……અને આ વિવાદ આગળ ન વધે તેં સમગ્ર હિન્દૂ ધર્મ નાં હિત માં છે….એ બધા માટે જરુરી છે…..મોરારી બાપુ પણ પોતાનુ તત્વજ્ઞાન બંધ કરી ભગવાન શ્રી રામ નાં જીવન ચરિત્ર નાં કથન થી સર્વ ને પાવન કરે એ પ્રાર્થના…! બાકી આજકાલ એમનાં પારાયણ માં કથા ઓછી….અને બીજી વાતો વધારે હોય છે…!! સ્વામિનારાયણ સંપ્રદાય ની ટીકા કરતાં પહેલાં એનો અભ્યાસ તો કરો….આ સંપ્રદાય જેટલો સનાતન હિન્દુ ધર્મ ના નિયમ ધર્મ માં દ્રઢ છે…..એટલો બીજો કદાચ કોઇ સંપ્રદાય નહીં હોય…..!!

    ચાલો……સંવાદ વિવાદ વચ્ચે ઝુલતા આ સમય ને…જીવન ને વિરામ આપીએ…..પણ યાદ રાખો…વિરામ વચ્ચે પણ જીવન ની આ ગતિ અટકવી ન જોઇએ…કારણ કે અહીં તો ચાલતા રહેવુ એ જ જીવન છે……માર્ગ અને ધ્યેય મળી ગયા છે…..હવે તો બસ ચાલવા નુ જ છે…!!!સાથે રહેજો…..રાજ


    1 Comment

    આજકાલ- ૨૩/૦૪/૨૦૧૯

    “એક વોટ….રાષ્ટ્ર નિર્માણ નો પાયો બની શકે છે”…..તો આજે ગુજરાતે અને દેશ નાં અમુક ભાગે- રાષ્ટ્ર નિર્માણ માટે દુનિયા ની સૌથી મોટી ચૂંટણી પ્રક્રિયા માં પોતાનો અધિકાર અજમાવ્યો……ઘણા સમય થી કોઈ પોસ્ટ નહોતી કારણ કે – ચૂંટણી ને ધ્યાન માં લેતા, સલામતી કારણોસર રવિસભા છેલ્લાં ત્રણ અઠવાડિયા બંધ હતી……

    તો આજકાલ શુ ચાલે છે જીવન માં ?? જોઈએ…

    • અત્યારે ચૂંટણી નો માહોલ છે….ટીવી ચાલુ કરો અને ન્યુઝ ચેનલ કરો એટલે ઘોંઘાટ થી ભરપૂર ડિબેટૉ , તમારા તન મન ને ધ્રુજવવા ચાલુ જ હોય…..લોકલ વિષયો…મફત ની લ્હાણી ઓ…ફાલતુ આરોપો વચ્ચે દેશ ની સર્વોપરિતા તો જાણે ચર્ચાતી જ નથી…. જે સમજુ છે, તેં સમજે છે કે છેલ્લાં 5 વર્ષ માં મોદી સરકારે દેશ માટે શુ કર્યું છે…!! એમનાં માટે તો કોઈ પ્રશ્ન જ નથી… પણ જે સગવડિયા છે…કેવળ ટૂંકી દ્રષ્ટિ થી પોતાનો જ વિચાર કરે છે…એને પપ્પુ ની વાતો ગોળ જેવી લાગશે જ….! આપણા માટે તો રાષ્ટ્ર જ સર્વોપરી…સર્વ પ્રથમ….માટે જ ડંકા ની ચોંટે…vote for modi…!!
    • આજે વોટિંગ હતુ….અને રિના સવારે સાડા ત્રણે ઉઠી તૈયાર થઈ ગઇ…એની ડયુટી હતી તો મારે પણ એની પાછળ ડયુટી હતી…. 😊 એને મુકી આવ્યો અને પછી રૂટીન કસરત…સ્નાન..પૂજા.. નાસ્તો કરી સૌથી પહેલો બુથ પર પહોંચી ગયો અને રાષ્ટ્ર નિર્માણ માં હોંશે હોંશે પોતાનો અધિકાર વાપર્યો…! સાંજે ગુજરાત ભાજપ પ્રમુખ જીતુભાઇ વાઘાણી અને જય શાહ મળ્યા…. જીતુભાઇ એ મને કહ્યુ કે તમારા જેવા જાગૃત નાગરિકો અને કાર્યકરો ને લીધે જ અમે ઉજળા છીએ….!! સાચી વાત…..ભાજપ એ પાયા નાં કાર્યકર્તા ઓ થી બનેલો પક્ષ છે….અને એ દેખાય છે…..સવારે વોટિંગ પછી હુ અને હરિ “મોદી દાદા ” ને જોવા અમારી સોસાયટી પાછળ ગોઠવાઈ ગયા….અને લોકો નો ઉત્સાહ જુઓ તો સમજાય કે મોદી શુ ચીજ છે…!!! અદ્ભૂત…!! હરિ તો હજુ મોદી… મોદી ની બૂમો પાડે છે….!! બસ હવે 23 મી મે નાં રોજ મોદી સાહેબ પુનઃ પ્રધાનમંત્રી જાહેર થાય એટ્લે ભયો..ભયો….!
    • અબુ ધાબિ મંદીર- છેક 1997 માં બ્રહ્મ સ્વરુપ પ્રમુખ સ્વામી નાં સંકલ્પ પછી…. આજે પ્રગટ બ્રહ્મ સ્વરુપ મહંત સ્વામી મહારાજ દ્રારા એ સંકલ્પ પુર્ણ થયો….! યવન દેશ માં… એ પણ ત્યાંના અન્ય ધર્મી શાસકો નાં ભરપૂર …અકલ્પનિય સહયોગ થી 7 શિખર નું અદ્ભૂત મંદીર, 2020 સુધી માં અબુ ધાબિ ની ધરતી પર શ્રી અક્ષર પુરુષોત્તમ મહારાજ અને અવતારો….ભારતીય સંસ્કૃતિ નાં વાવટા ફરકાવશે…!! આમાં પણ વડાપ્રધાન નરેન્દ્ર મોદી નો મોટો ફાળો રહ્યો છે….પણ પાયા માં તો મોટા પુરુષ નો …સ્વયં શ્રીજી નો બળિયો સંકલ્પ રહેલો છે….!! હજુ તો તમે જુઓ…….આ સંકલ્પ શુ કરે છે….!!
    • વેકેશન- જેનાં ઘરે તોફાની બાળકો હોય, તેને તો જરુર પ્રશ્ન થાશે કે….આ વેકેશનની સિસ્ટમ બનાવી કોણે…???😢😢 અમારો હરિ તો હાલતૂ ચાલતું વાવાઝોડું જ છે…..પરીક્ષા એ જેમતેમ આપી….જાણે કે ટીચર ની પોતાની પરીક્ષા ન હોય….!! વેકેશન પડયું ને અમારુ ઘર જાણે કે યુદ્ધ નું મેદાન હોય…તેવા હાલ હવાલ થઈ ગયા છે…..અમારી નીંદ( બપોરની…. 😊😊)ચેન ..ગુમ થઈ ગયા છે….ઘર ગોડાઉન થઈ ગયું છે…..!! ઘણીવાર થાય કે ચાલો મોદી ની સાથે ચૂંટણી પ્રચાર માં નીકળી જઇએ….કમસેકમ જે થોડો ઘણો આરામ મળ્યો તેં સાચો…!! હાહાહા…..!! હવે આ સ્થિતી જૂન સુધી ચાલશે…ત્યાં સુધી હરિ અનંતા… હરિ કથા અનંતા….!!! હા.. પણ હરિ નાં આ ચરિત્ર વચ્ચે એક ઠંડક પમાડે એવી વસ્તુ એ થઈ કે…શિશુ અધિવેશન માં , ભાઈ ને જીવન નો પ્રથમ શિર પાવ મળ્યો……!!

    તો બસ….ગરમી અને ઠંડક વચ્ચે…..કેરી નાં આગમન ની રાહ જોતાં…..મોદી સરકાર પુનઃ પ્રસ્થાપિત થાય તેની નિરંતર પ્રાર્થના કરતા કરતા સમય ને કાપી રહ્યાં છીએ…….( કે સમય અમને કાપી રહ્યો છે???) …ગઇ સાલ તો શિમલા મનાલી જઇ આવ્યાં હતાં…..આ વખતે જોઈએ આ સંઘ ક્યાં પહોંચે છે?? હરિ ઇચ્છા…!

    તો ચાલો પુનઃ મળશું…….!

    રાજ


    Leave a comment

    મે’હાંણા ની મુલાકાતે…

    ઉનાળો હવે ઉંબરે ઊભી ડોળા કાઢી રહ્યો છે…અને સ્કૂલો માં વેકેશન ના પગરવ સંભળાય છે…અને સ્વાભાવિક છે કે મન અત્યાર થી જ આયોજન કરવા બેસી જાય છે કે- આ વખતે વેકેશન માં ક્યાં જાશું??? ભેંસ ભાગોળે અને છાસ છાગોળે- જેવી ઘટના છે કારણ કે કાળ ને તો આપણે જાણતા જ નથી ….અને આજ પણ આપણાં હાથ માં થી સરકતી જાય છે…..સમય ને તમે પકડો છો કે- સમય તમને ?? ઉત્તર કઠિન છે પણ રસપ્રદ છે……!

    તો- આ મંગળવારે રીના ને રજા હતી તો- હરિ ને એની મનગમતી રજા પડી…!!! અને અમે અચાનક જ આયોજન કર્યું કે- ચાલો આજે અમદાવાદ ની 100-120 કિમી ની પરિઘી માં આવતા ઐતિહાસિક સ્થળો ની મુલાકાતે જઈએ….આમેય આપણાં બધા નું એવું છે કે- આપણે આખી દુનિયા ફરી આવીએ પણ ઘર ના ઓરડા જ બાકી રહી જાય…હું આટલા વર્ષ થી અમદાવાદ માં રહું છુ , છતાં અમદાવાદ ના જ ઘણા સ્થળ હજુ મે નથી જોયા…!! તો- નક્કી કર્યું કે- ચાલો મોઢેરા , પાટણ-સિદ્ધપુર જેવા ખૂબ જ ઐતિહાસિક ખ્યાતિ ધરાવતા સ્થળો ની મુલાકાત લઈએ……એક જ દિવસ નો પ્રવાસ અને પછી સાંજે સભા……દેહ નું અને જીવ બંને નું પોષણ જરૂરી છે…આથી જ ફટાફટ આયોજન કરી…ગૂગલ બાબા ના સહારે …GPS ભોમિયા ને આગળ રાખી ..નીકળી પડ્યા…! ધોમ ધખતો તડકો પણ અમારી ગાડી ના એસી મય વાતાવરણે અમારી હીમત ટકાવી રાખી…….! રસ્તો તો સાવ સીધો…..અમદાવાદ- મેહસાણા-પાલનપુર વાળો હાઇવે પકડવા નો…..અને અમારી યાત્રા મુજબ પહેલા પહોંચ્યા – ઊંઝા…મહેસાણા …વટાવો એટ્લે ત્યાંથી માત્ર 20-25 કિમી દૂર છે……માં ઉમિયા ના દર્શન કર્યા અને ઠંડા થયા…એમ કરી એ- સ્થળ પ્રમાણે જ મારા અનુભવો અહી લખું- કે જેથી તમને વધુ ખ્યાલ આવે…..શરૂઆત કરીએ…

    • ઊંઝા– આખા એશિયા નું સૌથી મોટું મસાલા અને તેલીબિયા નું બજાર છે……જીરું, વરિયાળી, ઈસબગુલ નું સૌથી મોટું માર્કેટ છે….અહી કડવા પાટીદારો ની કુળદેવી શ્રી ઉમિયા માં નું મંદિર છે , જેના દર્શને બધા જ આવે છે….ખ્યાતિ અંબાજી જેવી જ….પણ હાલ તેનું નવીનીકરણ કર્યું છે અને મંદિર ખૂબ જ સારી રીતે – બધા ભાવિકો ને શાંતિ થી દર્શન નો લાભ મળે- તેમ આયોજિત છે. ઉપર માતાજી ..બાજુમાં મહાદેવજી અને નીચે -ગણેશજી ની ખૂબ જ પ્રાચીન મુર્તિ ના દર્શન થાય છે…..અમે અહી જમવા નો લાભ લીધો…..માત્ર 30 રૂપિયા માં ગરમાગરમ ભોજન પ્રસાદ નો લાભ કોણ આપે?? ખરેખર- મંદિર ના દર્શન અચૂક કરવા…..! સર્વપ્રથમ અહી આવવા નું કારણ એ હતુ કે શાંતિ થી દર્શન થાય અને ભોજન નો સમયસર લાભ લઈ, અહી થી સીધા સિદ્ધરાજ જયસિંહ ની નગરી….સિદ્ધપુર પહોંચી શકાય….
    • સિદ્ધપુર– ઉંઝા થી 15-20 કિમિ દુર, સોલંકી વંશ ની રાજધાની એવું આ અતિ પુરાણું નગર, મહારાજા સિદ્ધરાજ જયસિંહે વસાવ્યું હતુ….એ સમયે કુંવારીકા નદી સરસ્વતી ને કિનારે વસેલા આ નગર ની ખ્યાતિ છેક ભારત ભર માં હતી…..રુદ્ર મહાલય, સિદ્ધેશ્વર મહાદેવ, બિંદુ સરોવર અને અને ત્યાં આગળ આવેલું મ્યુઝિયમ એક ખૂબ જ જોવાલાયક સ્થળ છે… અમે જ્યારે પહોંચ્યા ત્યારે google બાબાએ અમને સિદ્ધપુરની ગલી કૂંચીઓ માં ખૂબ ફેરવ્યા અને છેવટે રુદ્રમહાલય પહોંચ્યા તો ત્યાં આગળ પોલીસની હાજરી હતી….. છતાં અમે અંદર પ્રવેશ્યા અને મોબાઈલથી ફોટા લેવાનો પ્રયત્ન કર્યો તો અમને કોર્ટનો આદેશ બતાવી ફોટા લેવાની મનાઈ કરવામાં આવી……થોડાક નિરાશ થયાં.. છતાં ખુદ પોલીસે અમને એ સ્થળની માહિતી આપતા જણાવ્યું કે રુદ્રમહાલય સાત માળનો હતો અને અલાઉદ્દીન ખીલજીએ અને અહમદ શાહ પ્રથમ તેને તોડ્યો…..સિદ્ધપુર નો નાશ મોહંમદ ઘોરી એ સોમનાથનું મંદિર તોડ્યું ત્યારે રસ્તામાં આ નગર પર આક્રમણ કરી ને કર્યો…. અને ઈતિહાસ નું એક બેનમૂન સ્થાપત્ય ધૂળમાં મળી ગયું….. અત્યારે જે ખંડેર છે અને તોરણ છે એ જોઈને એક હજાર વર્ષ જૂના ભવ્ય ઇતિહાસ નો ખ્યાલ આવે છે …..અફસોસ…!!!એ પછી અમે એટલા જ પુરાના સિધેશ્વર મહાદેવ ના દર્શને ગયા ત્યાં આગળ સરસ્વતી નદી નો આરો છે અને માતૃ તર્પણ ની ક્રિયાઓ અહીં થાય છે….નદી તો અત્યારે સાવ સૂકી ભઠ છે, પણ ચોમાસા માં અહી પાણી રહેતું હશે…. સરકારે અહી ખૂબ જ વિકાસ કર્યો છે, જે સ્પષ્ટ દેખાય છે….. એ પછી અમે બિંદુ સરોવર ગયા…. સરકારના પુરાતત્વ વિભાગે ખુબજ પ્રસંશનીય કાર્ય કરી સમગ્ર વિસ્તારને આધુનિક ઓપ સાથે દર્શનીય બનાવ્યો છે સાથે-સાથે ત્યાં આગળ માતૃ તર્પણ ની પૂજા પણ થાય છે….અમે મોક્ષ પીપળા ને જળ ચડાવી, પ્રદક્ષિણા કરી, અમારાં માતૃ દેવો ની શાંતિ નું કાર્ય કર્યું…..બ્રાહ્મણો ત્યાં બેઠા જ હોય છે, આથી સાચવવું….!!! 😊 અને સિધ્ધપુર અને ગુજરાત ના ભવ્ય ઇતિહાસ ની ઝલક આપતું એક સંગ્રહાલય પણ છે એની અચૂક મુલાકાત લેવી….
    • પાટણ:- તમે સિધ્ધપુર જાઓ પછી ત્યાંથી અડધો કલાક દૂર વસેલું ઐતિહાસિક પાટણ શહેર છે,તેંની મુલાકાત ન લો તો ના ચાલે …..!!! ત્યાં જવું જ પડે કારણકે સિદ્ધપુરની ભવ્યતા નો ઇતિહાસ પાટણ સાથે જોડાયેલો છે અમે અડધો કલાક નો રસ્તો કાપી સીધા જ રાણકીવાવ પર પહોંચ્યા …..અદભુત વ્યવસ્થા અને સ્થળ કે જ્યાં ગ્રીન લૉન થી છવાયેલા બગીચાની વચ્ચે રાણકીવાવ સ્થિત છે જે ઈસવીસન ૧૦૬૩ માં રાણી ઉદયમતી દ્વારા બનાવવામાં આવી હતી …….! શું અદભૂત કોતરણી….!! તમે જુઓ ને દંગ થઈ જાઓ ……અમે- હરિ, રીના અને હું છેક નીચે સુધી ગયા( અત્યારે છેક પાણી સુધી જવાતું નથી…) અને ઢગલાબંધ ફોટા પાડ્યા…. એક એક શિલ્પ ની કોતરણી એટલી અદભુત છે કે તમારો સમગ્ર દિવસ એના અભ્યાસમાં જ વીતી જાય …..!!!અદભુત અદભુત…!! ઇતિહાસ ની આ ધરોહર ને પણ મુસલમાન આક્રમણખોરોએ તોડી નાખી…….અને મનુષ્ય ઇતિહાસ નાં આ દુર્લભ સ્થાન ને વર્ણવી ન શકાય એવું નુકસાન પહોંચાડ્યું છે…… ખરેખર એ સમયના ઇતિહાસ ને જો મુસલમાન આક્રમણખોરો એ નુકસાન ન પહોંચાડ્યું હોત તો સમગ્ર દુનિયામાં આ સ્થળો આજે દુનિયાભરમાં પ્રવાસીઓને અભ્યાસુઓને માટે એક અજાયબી થી ઓછા ન હોત …એમનો ડંકો વાગતો હોત…! અહી ના પત્થરો એ પોતે જ એક સંદેશ છે….!!! અદભુત અદભુત ….!!! તમને અચુક વિચાર આવે કે, આટલું મોટુ સ્થાપત્ય એ સમય માં કઈ રીતે બન્યુ હશે?? એ શિલ્પ કારો કેવા હશે??? …..ત્યારબાદ અમે પાટણના પટોળા માત્ર બહારથી જોઈ( ભાવ સાંભળો તો કપડા પહેરવા નું છોડી દો…😊) …. મન ને મનાવી….. પાટણ ના જગ વિખ્યાત દેવડા નો સ્વાદ માણી….. મોઢેરા જવા રવાના થયા……. gps ખુબજ કામ લાગ્યું…..સમય, ઇંધણ…ખૂબ બચ્યા….
    • નીચે ની લિંક પર વાવ નો વિડીયો અનુભવ કરી શકીશું…..
    • મોઢેરા– આ પણ અદ્ભૂત , પ્રાચિન સ્થળ છે, જે રાજા ભીમદેવે લગભગ 1000 વર્ષ પહેલાં વસાવ્યું હતુ…..સુર્ય મંદીર, જ્ઞાનેશ્વરી વાવ ને કારણે હજારો પ્રવાસીઓ અહીં ખેંચાઈ આવે છે બાજુમાં મોઢેરા ગામ છે……અમે પહોંચ્યા ત્યારે ખરાં બપોર નો સમય હતો, તડકો જોરદાર હતો, છતા પ્રવાસીઓ ઘણા હતાં…..સરકારે આ ઐતિહાસિક સ્થળ ને સાચવવા નો ઘણો પ્રયત્ન કર્યો છે, છતા જનતા હૈ કી માનતી નહીં…!! લોકો આડેધડ ફોટા પાડવા ની લહાય માં આ અદ્ભૂત શિલ્પ કૃતિ, તેનાં ઇતિહાસ તેનાં મહિમા ને ભૂલી જાય છે….બસ ફોટા પાડી ને રવાના…!! પણ જરાક ઇતિહાસ માં ડોકિયું તો કરો…..!! સરકાર દર વર્ષે અહી જાન્યુઆરી કે ફેબ્રુઆરી માં સુર્ય ઉત્સવ ઉજવે છે…..ત્યાં આગળ હજારો લોકો તેનાં દર્શને આવી આ સ્થળ નો મહિમા સમજવા પ્રયત્ન કરે છે……! ત્યાં પણ જે ખંડિત શિલ્પો છે , તેની પ્રદર્શની પણ છે…….

    અંતે, મોઢેરા માં અમારી મે’હાંણા યાત્રા ને વિરામ આપી GPS ની મદદ થી અમદાવાદ પરત ફર્યા….રસ્તામાં અમારા પ્રિય સ્થળ- ત્રિમંદીર માં સાંજ ની પેટ પૂજા પુરી કરવા માં આવી…..અને ભારે ટ્રાફિક વચ્ચે ઘરે પધાર્યા…….

    હવે અમે ફરી ને તો આવ્યાં….પણ એનાં આધારિત મારી વણ માગી સલાહો…આ અનુભવ ને આધારે સાંભળી લ્યો….

    • ગરમી માં ફરવા જવું એ એક પોતે જ પડકાર છે….ગાડી નું એસી પાવરફુલ હોય, ટોપી ચશ્મા અને ઘણુ બધુ પાણી સાથે લઈ લેવું….સૂકો નાસ્તો પણ સાથે રાખવો……મેહાંણાં બાજુ અને લગભગ આખા ગુજરાત માં ગરમી પાપડ શેકાય તેવી પડે છે……
    • જમવા નું ઉંઝા માં જ ગોઠવવું….બીજી કોઈ જગ્યા એ ..હોટલ સિવાય તમારો મેળ નહીં પડે….સિદ્ધપુર કે મોઢેરા જેવા સ્થળો એ તો વિદેશી પર્યટકો પણ આવે છે….છતા કોઈ સારી હોટલ કે રેસ્ટોરન્ટ નો અભાવ છે….પાટણ રણકી વાવ પાસે માં ગુજ સરકાર ની તોરણ કરી ને હોટલ છે તો મોઢેરા માં તોરણ નામે મજાક છે……આથી જ ઉંઝા માં 12 વાગ્યા સુધી માં દર્શન અને ભોજન થઈ જશે….અને વળતી વખતે ત્રિમંદીર, અડાલજ માં શુદ્ધ સાત્વિક ભોજન મળી શકશે….
    • આ બધા ઐતિહાસિક….પ્રાચિન સ્થળ છે….ફરવા જતા પહેલા તેં વિશે થોડોક અભ્યાસ કરી ને જાઓ તો વધું મજા આવે……સિદ્ધપુર માં ચોમાસા માં જવું…..સરસ્વતી નદી માં પાણી દેખાશે……
    • જો પ્રવાસ એક દિવસ થી વધું નો ગોઠવવોં હોય તો અડાલજ, બેચરાજી, મહુડી જેવા સ્થળો પણ એમા આવરી શકાય……રોડ સારા છે, પણ ટ્રાફિક ની સરખામણી માં ઉતરતા કહેવાય…….

    તો વધું શુ કહેવું?? જાતે જ ફરો……જાતે જ અનુભવ કરો….ઇતિહાસ ને ઊંડાણ થી વાંચો….અને મહિમા સમજો……

    ઢગલા બંધ ફોટા પાડ્યા છે…..મિત્રો માટે ફેસબૂક પર ચોંટાડયા છે……

    ફરતા રહો…..

    રાજ


    Leave a comment

    જોવા જેવી દુનિયા

    ખરેખર……આ દુનિયા..આ જગત…..આ ધરા…જોવા જેવી..માણવા જેવી અને એનાથી વિશેષ સમજવા જેવી જ છે…..! માત્ર જોવા થી કે અનુભવવા થી ન ચાલે એવી આ વાત છે…..કારણ કે- આ જગત એથી કૈંક અધિક છે. પેલું જૂનું હિન્દી ગીત છે ને કે….” યે કૌન ચિત્રકાર હૈ…..” જેવી આ વાત છે…..રંગ તો દેખાય છે પણ એની પાછળ નો ચિત્રકાર સમજાતો નથી……જગત તો દેખાય છે પણ એની પાછળ – એનો કર્તાહર્તા દેખાતો નથી….સમજાતો નથી……એના હેતુ સમજાતા નથી…..! 

    અને એટલા માટે જ બુધ્ધિ ના..તર્કના..વિજ્ઞાન ના  સીમાડા લાંઘી ને આધ્યાત્મ ના સીમાડા સુધી પહોંચવું પડે અને ત્યાં પહોંચ્યા પછી હર ડગલે ને પગલે સત્પુરુષ ની જરૂર પડે છે…કારણ કે- અધ્યાત્મ નો માર્ગ અતિ કઠિન છે ….સત્પુરુષ ના માર્ગ દર્શન..એમની કૃપા …એમના જ્ઞાન વગર આ માર્ગ પર આગળ વધાતુ જ નથી…….બ્રહ્મ વડે જ બ્રહ્મ થવાય……જેમ હીરા વડે જ હીરો વીંધાય છે  તેમ..! માટે જ આત્મજ્ઞાન મેળવવું હોય તો- આત્મજ્ઞાની પાસે જવું પડે…..અને “જોવા જેવી દુનિયા” ના સર્જક..પ્રેરક દાદા ભગવાન, નીરુમા અને એમના અધ્યાત્મિક વારસદાર પૂ.દીપકભાઈ દ્વારા આ કાર્ય થઈ રહ્યું છે…..મને સ્વામિનારાયણ સત્સંગી હોવા ને નાતે – અધ્યાત્મિક માર્ગે થતાં આવા  વિશાળ કાર્યો નો હેતુ..મહિમા અને પરિણામ નું જ્ઞાન છે…….આથી જ હું આવા કોઈ પણ કાર્યો ને – કે જેનો હેતુ જીવ નું કલ્યાણ છે- તેને સમર્થન આપું છુ…..

    તો- તારીખ 15 થી 25 નવેમ્બર સુધી – ત્રિમંદિર અડાલજ સુધી ચાલનારા આ ભવ્ય આયોજન વિષે સાંભળ્યુ હતું અને સમય મળતા જ હરિ ને લઈને અમે ત્યાં રૂબરૂ જઈ આવ્યા…….કારણ કે જાત અનુભવ જ શ્રેષ્ઠ શિક્ષક છે -એ ન્યાયે ત્યાં જવું અનિવાર્ય હતું…….તો મારા અનુભવ કેવા રહ્યા…………એનો ગુલાલ કરી એ …..પણ એ પહેલા – આ આયોજન ની વધુ માહિતી મેળવવા નીચેની લિન્ક પર જાઓ…..

    જોવા જેવી દુનિયા 

    તો- મારા અનુભવ કેવા રહ્યા….?

    પ્રથમ સારા અનુભવ….

    • ….અદ્ભુત મેનેજમેંટ – પાર્કિંગ થી લઈને રસોડા સુધી ની અદ્ભુત વ્યવસ્થા……લગભગ  35 લાખ ચોરસ ફૂટ માં ફેલાયેલું આ આયોજન -હજારો સ્વયંસેવકો અને ચારેતરફ  CCTV કેમેરા..ડ્રોન કેમેરા  – સારી સ્વચ્છતા થી શોભતું હતું……પાર્કિંગ માં થી જ બસ મૂકેલી- જેમાં બેસી ને – રોડ ની સામે જ રહેલા આ સ્થળ પર જઈ ને -પરત પણ આવી શકાય………..ત્યાં પહોંચો એટ્લે 1 થી 12 વર્ષ સુધી ના બાળકો માટે ફરજિયાત ઓળખપત્ર બનાવી એમને બાળકો ને લગાવી દેવાનું….! ખરેખર સારી સિસ્ટમ લાગી…! પાસે જ વ્હીલચેર અને જનરલ એનાઉન્સ્મેંટ રૂમ…જેથી સતત જાહેરાત-સૂચનો થતાં રહે…….અરે સમગ્ર કાર્પેટ એરિયા ને ગ્રીન નેટ થી -પેવર્સ થી ઢાંકી દેવામાં આવ્યો હતો – જેથી વ્હીલચેર અને સાઇકલ લઈને પણ અહી ફરી શકાય..ધૂળ નું નામોનિશાન નહીં…..ઠેર ઠેર કચરાપેટી ઑ- અને સ્વયંસેવકો -કચરો સાફ કરતાં જ રહે……!
    • પ્રોગ્રામ ની થીમ- વિવિધ પ્રદર્શન ખંડ  નું આયોજન પણ સારું હતું………….તમામ ઉમર ની વ્યક્તિઓ માટે – ઉમર ને આધારે પ્રદર્શન ખંડ હતા…….હરિ એ તેની  ઉમર ના હિસાબે ત્રણ પ્રદર્શન ખંડ- નો લાભ ઉઠાવ્યો……કાર્ટૂન કેરેક્ટર્સ – પાંડા-શિફું -ટોમ અને જેરી જેવા પાત્રો ને આધારે – બાળકો ના આચાર-વિચાર નો સુધારો સહજ માં કરી શકાય એ અહી જાણવા મળ્યું……! તો- દાદા ભગવાન અને તેમના અક્રમ વિજ્ઞાન નો ખ્યાલ આપતા પ્રદર્શન ખંડ પણ અદ્ભુત હતા…….સાથે સાથે પૂ.દીપકભાઈ ની લાઈવ સભા પણ સમાંતર – નિયત સમયે ચાલતી હતી……..ટૂંકમાં આયોજન અદ્ભુત હતું….
    • જમવાનું- આપણાં લોકો નું ધ્યેય- પહેલા ભોજન અને પછી ભજન – જ હોય છે- અને તેથી જ જીવ ને ભોજન ની સાથે ભજન સુધી લઈ જવા- ઠેર ઠેર અંબા ફૂડ્સ ના સ્ટોલ અને ભોજન શાળા નો પ્રબંધ મને ગમ્યો…..30 રૂપિયા ના નજીવા ચાર્જ માં સ્વાદિષ્ટ ભોજન નો આસ્વાદ કોઈ પણ લઈ શકે તેવી વ્યવસ્થા પણ હતી…..પીરસવા નું….ડિશ વોશર મશીન ની વ્યવસ્થા…..ઠેર ઠેર પાણી માટે ની ટેન્ક ની વ્યવસ્થા અદ્ભુત હતી…….જેને ફૂલ ડિશ ન જમવી હોય તેમના માટે વિશાળ ફાસ્ટ ફૂડ ના સ્ટોલ હતા..જેમાં ગુજરાતી-પંજાબી-દક્ષિણ ભારતીય- આફ્રિકન-મેક્ષિકન-ચાઇનિજ …તમામ પ્રકાર ના વ્યંજન હતા……ટૂંક માં કોઈ ભૂખ્યો ન જવો જોઈએ…..!!! ભોજન શાળા માં શિસ્ત અદ્ભુત હતી………….! હરિ ને તો આઇસ્ક્રીમ- કુલફી અને ચોકલેટ માં મજા પડી ગઈ……..
    • ત્સંગ- મુખ્ય વાત- પૂ. દિપક ભાઈ ની સભાઓ ને મે ટીવી પર- અને રૂબરૂ પણ અલપજલપ નિહાળી છે…….એમની રીત- સહજ છે-પ્રશ્નોત્તર થી ભરપૂર છે- અને એ માટે સવાર સાંજ બે સમય અહી- એનું વિશાળ ખુલ્લા પણ 6-8 LED સ્ક્રીન – આસ્થા ટીવી પર લાઈવ ટેલિકાસ્ટ થી સત્સંગ નો લાભ મળે છે…..તમને યોગ્ય લાગે ત્યાં બેસી ને તેનો લાભ લઈ શકો એ માટે વિશાળ બેસવા ની જગ્યા છે…….સ્ટેજ અદ્ભુત બનાવ્યું છે – અમારા બેપ્સ ના પ્રોગ્રામ ની જેમ જ……તેના પર રોજ સાંજે સાંસ્કૃતિક પ્રોગ્રામ પણ થાય……ડ્રોન થી પ્રસારણ અને કંટ્રોલ બંને થાય -તેનું આયોજન અહી દેખાયું………….

    તો- હવે વાત – મારી દ્રષ્ટિ એ શું સુધારો -સૂચન થઈ શકે?? જો કે મારી કોઈ પાત્રતા નથી છતાં – મારા અનુભવ ને આધારે શું વધુ સારું થઈ શકે?? 

    • સ્થળ – લોકો ( સર્વ ને અહી બધા સ્વયંસેવક મહાત્મા તરીકે જ બોલાવે છે….અદ્ભુત વાત) અર્થાત મહાત્મા ઑ ની ભીડ- સ્થળના વ્યાપ થી અધિક હોય છે..આથી આયોજન માટે હજુ મોટું સ્થળ હોત…..તો સારું થાત…….! બે પ્રદર્શન ખંડ – વચ્ચે ની જગ્યા..ગાળો નાનો હતો…આથી ભીડ ને લીધે થોડીક ગૂંગળામણ જેવુ થાય છે……એમાં સુધારો થઈ શકે…..
    • પ્રદર્શન- આયોજન હજુ વધુ સારું થઈ શકે- terrific terry નામના બાળકો ના શો માં અમે ગયા તો- એક ક્લિપ પૂરી થઈ અને લોકો ઉઠી ને ચાલવા લાગ્યા……આયોજકો- લોકો ને રોકી શકે એવું રહ્યું નહીં…..ઉલ્ટા નું લાઇટ ચાલુ કરી તો બધા જ બહાર ચાલ્યા ગયા……તો આની એક શો માં- ચાલુ શો એ લાઇટ જતી રહી- તો ગૂંગળામણ ને લીધે- ઘણા માતાપિતા બાળકો ને લઈને – બહાર નીકળી ગયા….!!! તો આમાં સુધારો થઈ શકે…..
    • એ જ રીતે – જો પ્રદર્શન ખંડ – આપણે બેપ્સ માં હોય છે તેમ એક બીજા ને સમાંતર- સામસામે રાખ્યા હોત……તો ભીડ ને મહદઅંશે નિવારી શકાય……વળી- પ્રદર્શન માત્ર ……સાંજે 4 થી 10 વચ્ચે જ હોય છે…એના બદલે આખો દિવસ ચાલુ રખાય તો- આટલી બધી ભીડ કદાચ એક જ સમયે ન આવે……! બધા ને સુખ આવે……
    • સુરક્ષા- જો કે આ મુદ્દો બધા જ વિશાળ આયોજનો માં એક સમસ્યા જ છે…….આટલી બધી વિશાળ જનસંખ્યા ને સુરક્ષા ની દ્રષ્ટિ એ સાચવવી અઘરી છે- છતાં આજકાલ નું વાતાવરણ જોતાં- આવું જોખમ ન લેવાય……- દરેક દર્શનાર્થી ને ચેક કર્યા સિવાય પ્રવેશ આપવો- જોખમી જ છે……..આમાં કૈંક થવું જોઈએ……
    • સ્વયં સેવકો- દરેક ને આઈ કાર્ડ આપેલા હતા…છતાં – જો એક યુનિફોર્મ જ રાખ્યો હોત તો- તે બધા થી અલગ જ તરી આવત – અને વધુ સારું કામ થઈ શકે……

    છતાં- આવું અદ્ભુત આયોજન – ધન્યવાદ ને પાત્ર છે- મુલાકાતીઓ નો ઉત્સાહ- સ્વયં સેવકો નો દાખડો- મોટા પુરુષ ની પ્રેરણા અને આયોજકો ની મહેનત રંગ લાવી છે……! જો આવનારા મુલાકાતીઓ ના જીવન માં અહી મુલાકાત થી – સહેજ પણ સુધારો આવે- સત્સંગ નો મહિમા સમજાય તો યે – આ આયોજન સફળ છે તેમ કહેવાય…!!! 

    એક સ્વામિનારાયણ સત્સંગ તરીકે- બેપ્સ ના એક કાર્યકર તરીકે – જેમ મને મારી સંસ્થા ના અદ્ભુત ..આનાથી પણ વિશાળ આયોજનો પર ગર્વ છે તેમ ખુલ્લા મને – આવા અન્ય આયોજનો માં થી પણ અઢળક શીખવા મળે તેનો આનંદ છે……..ખાસ કરી ને રસોડાનું મેનેજમેંટ – માં થી આપણે ઘણું શીખી શકીએ તેમ છે……!  

    બસ- સર્વ દિશાઓ માં થી શુભ વિચારો- સૌનું કલ્યાણ કરતાં રહો……..જીવન માં પ્રતિક્રમણ ને આધારે – અંતરદ્રષ્ટિ નું બળ વધે- ગુરુ નો રાજીપો મળે- સ્વભાવો ટાળી ને- બ્રહમરૂપ થઈ – પરબ્રહ્મ ની સેવા માં રહેવાય – એટ્લે ભયો ભયો…!!

    25 તારીખ ને હજુ વાર છે- અચૂક મુલાકાત લો………!! કારણ કે ….આ દુનિયા જોવા જેવી છે- સમજવા જેવી છે….

    રાજ 


    Leave a comment

    હિમાલય ડાયરીઝ-૨૦૧૮

    “સાધુ તો ચલતા ભલા…..” ….જીવન એ માત્ર ચાલવા નું નામ નથી….પણ ચાલતા ચાલતા સ્થિર થવું એ – આ નિરંતર યાત્રા ની ફલશ્રુતિ છે. અને યાત્રા એ સૃષ્ટિ ના કણેકણ માં વ્યાપ્ત એક એવી પ્રક્રિયા છે જે જીવંતતા નું પ્રતિક છે……બોસોન પાર્ટીકલ્સ થી માંડી ને અનંત બ્રહ્માંડ સુધી ના દરેક તત્વ સતત ગતિ કરતા રહે છે…એક નિશ્ચિત માર્ગ પર સતત..નિરંતર..અસ્ખલિત યાત્રા કરતા રહે છે ..અને આપણ ને સંદેશો આપતા રહે છે……ચાલવું એ જીવન છે…અને અટકવું એ મોત…! ..અને શ્રીજી ની પરમ કૃપા કહો કે દયા….હું સતત ચાલતો- ભાગતો રહ્યો છું…અને જયારે જયારે હું મનેકમને અટક્યો છું..ત્યારે દુખી દુખી થઇ ગયો છું……માટે જ વિચરણ..યાત્રા….દોડવું એ મારું જીવન…સ્વભાવ રહ્યો છે……અને એટલે જ કદાચ અટકી ને પણ હું સતત દોડતો રહ્યો છું……બસ હવે “સ્થિર” થવા માં પડ્યો છું……!

    તો અત્યાર સુધી મારી નોકરી એવી હતી કે- મને લગભગ સમગ્ર ભારત દર્શન નો લાભ મળ્યો છે…પણ એકલા એકલા…..રીના અને મારો સમય એકસાથે નહોતો ચાલતો..પણ હવે આ શક્ય બન્યું અને પત્ની-પુત્ર સાથે ફરવા નો મોકો મળી ગયો…..અનેક મનોમંથન પછી ફરવા ક્યાં જવું…..કઈ રીતે જવું…..કેટલા દિવસ માટે જવું?? એ બધા પ્રશ્નો ના ઉત્તર શોધવામાં આવ્યા…..ઉત્તર મળ્યા પછી બધું આયોજન રીના ના હાથમાં આવ્યું…..તૈયારી શરુ થઇ અને અમારો ધમાલિયો પરિવાર- હિમાલય ની ગોદમાં- અર્થાત હિમાચલ પ્રદેશ ના પ્રખ્યાત યાત્રી સ્થળ- શિમલા..કુલ્લુ..મનાલી….રોહતાંગ પાસ….ચમ્બા..ડેલહાઉસી…ખજિયાર….અમૃતસર…દિલ્હી ની મુલાકાતે ઉપડ્યા……૧૦ દિવસ ના પ્રવાસ માં કેવા અનુભવ થયા…..કેવું રહ્યું…..શું ધ્યાન રાખવું…..શું કરવું/શું ન કરવું…..એની જાણકારી- મારી દ્રષ્ટિ થી માણીએ……

    • અમે ઉત્તર ભારત માં પ્રથમ વાર જ આવો પ્રવાસ કરી રહ્યા હતા…આથી અનેક પ્રશ્નો અમારી સામે હતા…અને ખાસ કરી ને- રહેવા- જમવાનો પ્રશ્ન…..કારણ કે- ધર્મ નિયમ છોડી ને જલસા ન થાય….એ છે તો આપણે છીએ…એ અમારી પ્રાથમિકતા હતી…છે અને સદાયે રહેશે…! આથી એક જ વિકલ્પ બચ્યો- ટુરિસ્ટ એજન્સી થકી જ જવું..કે જેમાં – બધું આવી જાય..આપણા નિયમ ધર્મ ને અનુકુળ આવે એવું થાય….આથી અમારા સ્વામિનારાયણ સત્સંગી ની ટુર એજન્સી નું જ પેકેજ લેવામાં આવ્યું….જેના પેકેજ માં- અમદાવાદ થી દિલ્હી- ફ્લાઈટ..અને દિલ્હી થી એસી બસ માં- બધા સ્થળો એ- રહેવાનું- જમવાનું- બધું આવી ગયું…લોકલ ટ્રાવેલ ખર્ચો અલગ થી….! તો અમારી સવારી ઉપડી…!
    • દિલ્હી સુધી તો શાંતિ રહી….પણ અમારા ટુર ગ્રુપ ના ૬ સભ્યો અમદાવાદ એરપોર્ટ પર ફસાઈ ગયા…એમને દિલ્હી બીજી ફ્લાઈટ માં લાવવા માં આવ્યા…એ આવ્યા પછી અમે ઉપડ્યા શિમલા…! રસ્તા માં બસે દગો દીધો….હેરાન થયા….અને છેક સાંજે શિમલા પહોંચ્યા….ત્યાં હોટલ સારી હતી….સ્નાન કરી-પૂજા કરી પાણી પીધું..અને જીવમાં જીવ આવ્યો….બીજા દિવસે સવારે શિમલા લોકલ સાઈટ જોવા જવામાં આવ્યું…..ખુબ મજા આવી….કુફરી માં – ઘોડે સવારી ની મદદ થી પર્વત પર જીવન નું સૌથી કપરું ચઢાણ..અને ઉતરાણ કરવામાં આવ્યું…..યાદગાર અનુભવ રહ્યો…..હરિ તો – સૈનિક ના રોલ માં આવી ગયો….કાઠી દરબાર નો આત્મા જાગી ઉઠ્યો અને હોંકારા પડકારા-સ્વામિનારાયણ ..સ્વામિનારાયણ ની ગુંજ થી શિમલા ધ્રુજી ઉઠ્યું… 🙂 હહાહા…..!

    IMG_20180521_110643

    • પછી તો- શિમલામાં જ અતિ પ્રાચીન..સૌથી વધુ ઉંચાઈ પર રહેલા – જાખું ના હનુમાનજી મંદિર ના દર્શને જવામાં આવ્યું…..રસ્તા એવા ભયાનક કે- આપણે તો ગાડી ચલાવવા ની જ ના પડી દઈએ..પણ ત્યાના ડ્રાઈવર માટે તો આ એક રમત માત્ર હતું….! બધા ને જીવન ની ક્ષણ ભંગુરતા નો અનુભવ થયો……પછી તો- મોલ રોડ- ચર્ચ- સ્કેન્ડલ પોઈન્ટ પર – ચાલતા જવાનો- આઈસ્ક્રીમ-જ્યુસ-ખરીદી- ફોટો ગ્રાફી નો આનંદ ઉઠાવવા માં આવ્યો…..! ખુબ મજા ની જગ્યા છે..અચૂક આનંદ લેવો…..
    • મોડી રાત્રે – મનાલી જવા નીકળ્યા……રોજીંદો રસ્તો બંધ હતો તો ડ્રાઈવર રસ્તો ભૂલી ગયો…અને આખી રાત ના ખુબ જ જોખમી- રસ્તા-પહાડ-જંગલ ની મુસાફરી પછી પણ સવારે GPS માં જોયું તો – શિમલા થી અમે માત્ર ૪૦ કિમી જ દુર હતા…!! ઓત્તારી……! હહાહાહા……..અને મનાલી હજુ ૩૦૦ કિમી દુર હતું……રાત બગડી…મૂડ બગડ્યો…….પણ શું થાય…?? હરી કરે સો હોઈ…!!! પછી તો રસ્તો પૂછતાં પૂછતાં છેક કુલ્લુ ૫ વાગ્યે સાંજે પહોંચ્યા…મહારાજે જમવાનું બનાવ્યું..ત્યાં સુધી માં બધા બિયાસ નદી ના અતિ ઠંડા પાણી માં રીવર રાફટીંગ કરી આવ્યા……અમે તો નદી માં છબછબીયા કરી ભરપુર આનંદ લીધો….હરિ તો પાણી જોઈ ગાંડો થયો અને ડૂબકા લગાવી ખુબ ન્હાયો……!! ખુબ મજા આવી..આખા દિવસ નો થાક ઉતરી ગયો…..અને જમી- મનાલી ના ભારે ટ્રાફિક વચ્ચે રાત્રે ૧૧ વાગ્યે હોટલે પહોંચ્યા……
    • બીજા દિવસે મનાલી માં – અતિ પ્રાચીન એવા હિડમ્બા મંદિર..ના દર્શને ગયા…..ખુબ જ અદ્ભુત સ્થળ…..મનાલી માં ઘણા સારા સારા સ્થળ છે પણ અમારી પાસે પુરતો સમય ન હતો…આથી હિડિંબા મંદિર…તેની સામે ઘટોત્કચ મંદિર…એની સામે હિમાચલ મ્યુઝીયમ અને મનાલી ના મોલ રોડ નો લાભ લેવામાં આવ્યો…ગરમ કપડા ખુબ સસ્તા ..સારા મળે છે..ખરીદી કરી…..હરિ ભાઈ એ રમકડા ની દુકાન જોઈ- એમના ચરિત્ર ચાલુ કર્યા…અને માંડ માંડ હોટલે પાછા આવ્યા……! મનાલીનો આનંદ લેવો હોય તો- ૩-૪ દિવસ તો ઓછામાં ઓછું રોકાવું….! બીજા દિવસે- સવારે ૨ વાગ્યે રોહતાંગ પાસ જવા નીકળ્યા…લેહ મનાલી નો હાઇવે છે…..જે લગભગ ૨૫૦-૩૦૦ કિમી નો એક સાહસિક પ્રવાસ છે…..રોહતાંગ પાસ – માત્ર ૬૦ કિમી દુર છે છતાં અમને ભારે ટ્રાફિક ના કારણે ત્યાં પહોંચતા લગભગ ૭ કલાક થયા….!!!! પણ એકવાર ઉપર પહોંચ્યા પછી સૃષ્ટિ ની જે ભવ્યતા છે તેનું અહી વર્ણન ન થઇ શકે..!!! પર્વત ની ટોચ ઉપર બર્ફીલા મેદાન..એમાંથી નીકળતી નદી….એકદમ શુદ્ધ બરફ…..આજુબાજુ હિમાલય ની વિશાળતા અને ચમકતા શિખરો…..!! અદ્ભુત…અદ્ભુત……! મેં નીલકંઠ વરણી ની હિમાલય યાત્રા…..બરફ ના તોફાનો ને યાદ કર્યા……..રોહતાંગ ના નામ નો અર્થ પૂછ્યો તો લોકલ ગાઈડે કહ્યું કે- રોહતાંગ એટલે મૃતદેહો નો ઢગલો…! કારણ કે ત્યાં વાતાવરણ એટલું ભયાનક છે કે- ગમે ત્યારે બદલાઈ જાય….અને ભૂતકાળ માં અનેક લોકો – પોતાના જીવન થી હાથ ધોઈ બેઠા છે…..!! અમને પણ એનો અનુભવ થયો…..જેવા નીચે ઉતર્યા કે- વાદળો ઘેરાવા લાગ્યા…..!!! જે હોય તે- ત્યાં બરફમાં બધાએ ખુબ મજા કરી…..બરફ માં નાસ્તો કર્યો…..નાચ્યા…હરિ એ – સ્નો મેન બનાવવા નો પ્રયત્ન કર્યો પણ ઠંડી એટલી કે – સ્નો મેન બનતા પહેલા જ અમે થીજી ગયા….!!! મેં તો કપડા કાઢી ને ઠંડી નો પ્રત્યક્ષ અનુભવ કર્યો…….બાપ રે..શું ઠંડી…!!!! માઈનસ ૨૦ ની આસપાસ હશે જ…!! છેવટે નીચે આવ્યા….એ પણ ૫ કલાક બાદ અને જમ્યા…..!

    • પુનઃ સાંજે ચમ્બા જવા નીકળ્યા…….! લગભગ અહી બધા સ્થળ રાત્રી મુસાફરી કરો તો જ પહોંચી શકાય તેમ છે….આથી રાત્રી મુસાફરી મજબૂરી હતી…..બીજા દિવસે રાવી નદી ને કિનારે કિનારે -હિમાચલ ના પ્રાચીન નગર ચમ્બા માં પહોંચ્યા…..ફ્રેશ થઇ….એકાદશી હતી આથી ફરાળી ભોજન કરી ને ત્યાના સ્થાનિક સ્થળો ની મુલાકાતે જવામાં આવ્યું. ચાલતા જવાની મજા જ અલગ છે…..ભુરીસિંગ મ્યુઝીયમ ગયા પણ એ બંધ થઇ ગયું હતું..લક્ષ્મીનારાયણ મંદિર..હરિરાય મંદિર ના દર્શન કર્યા….બીજા સ્થળ છૂટી ગયા….પણ બીજા દિવસે- ત્યાંથી જ લોકલ ટેક્ષી કરી- નજીક ના સ્થળ- ડેલહાઉસી અને ખજિયાર જઈ આવ્યા……રસ્તા માં ભેલાઇ માતાજી ગયા …ચમેરા ડેમ માં બોટિંગ કર્યું……ડેલહાઉસી -ચમ્બા કરતા ઘણું ઠંડુ અને આહ્લાદક છે…….અંગ્રેજો ના સમય ના મકાનો..ચર્ચ..માર્કેટ જોવા લાયક છે અને શાંતિ થી રહેવા માટે આનાથી ઉત્તમ જગ્યા બીજી કોઈ ન હોઈ શકે……!!! ખજિયાર તો યાત્રીઓ માટે ખુબ જ પ્રખ્યાત છે…..ભારતીય સ્વીત્ઝર્લેન્ડ કહેવાય છે…….એકદમ ખુલ્લું ગ્રાઉન્ડ….ઠંડી હવા….લીલુછમ મેદાન અને ઢગલાબંધ રાઈડ્ઝ…..!! હરિ ને તો ડિસ્ક રમવાની મજા પડી ગઈ…..દોડધામ…..ફ્રુટ ડીશ ની મજા…ઢગલાબંધ નાસ્તો….પછી પૂછવાનું જ શું??? ચમ્બા પરત ફરતી વખતે – રસ્તામાં થી લાલ મૂળા લીધા…..પહાડ માં થી વહેતા ઝરણા નું કુદરતી મિનરલ પાણી પીધું…અને દિલ બાગ બાગ થઇ ગયું…….!
    • પુનઃ રાત્રે…..હા જી રાત્રે…..જ અમૃતસર જવા નીકળ્યા……સવારે પહોંચી ગયા……અને અમૃતસર પહોંચ્યા એટલે જાણે કે સીધા ફ્રીજ માં થી ઓવન માં ઘુસી ગયા હોય તેવો અનુભવ થયો……અને લાગ્યું કે- વેકેશન નું સુખ -બાષ્પ બની ઉડી ગયું છે……! શું ગરમી……યાર…૪૩ ડીગ્રી….ઉફ્ફ…!! એસી રૂમ માંથી નીકળવું એટલે કે જાણે પાપ કર્યા હોય તેમ લાગતું…..છતાં એવી ગરમી માં વાઘા બોર્ડર ગયા…..સાચું કહું તો હું એ – ત્યાં થતી ઉજવણી થી રાજી ન થયો……દેશભક્તિ માટે -આ જરૂરી છે…પણ ઘણે ઠેકાણે મને બિન જરૂરી ઉન્માદ લાગ્યો…..! ધ્વજ ઉતારવા ની ક્રિયા શાંતિ થી….પણ થઇ શકે….લોકો ના બુમબરાડા..અતિશય ગરમી…..થોડીક વધારે પડતી રાખી…! જે હોય તે..પણ જય હિન્દ……સામે પાકિસ્તાન પર તો દયા આવી ગઈ….સાવ ગરીબ પ્રેક્ષકો ..એ પણ છુટા છવાયા………અને આપણે અહી તો કડક ધડક…..!! એમનો તો કોઈ ક્લાસ જ નહિ….સાવ ભિખારી દેશ……!…..મોડી રાત્રે – સુવર્ણ મંદિર ગયા…….રાત્રે ૧૧ વાગ્યે પણ ભક્તો ની ભીડ જોઈ -હૃદય રાજી થઇ ગયું…….શીખ ભક્તો ની સેવા…..અદ્ભુત હતી….અમૃત સરોવર માં પગ ભીંજવ્યા…..પ્રદક્ષિણા કરી….મુખ્ય મંદિર માં મોટી લાઈન હતી આથી બહાર થી જ દર્શન કરી પરત ફર્યા……અમારા હરીભાઈ નું એક સ્લીપર ખોવાઈ ગયું..આથી બીજું પણ ત્યાં મૂકી ને આવ્યા…..! રસ્તામાં અમૃતસર ની પ્રખ્યાત લસ્સી નો લાભ લીધો…..એક ગ્લાસ માં થી ત્રણ ગુજરાતી સંતૃપ્ત થઇ શકે – એવી લસ્સી પી ને ધન્ય થઇ ગયા…!!! અને પાછા વહેલી સવારે દિલ્હી જવા રવાના થયા…અને ત્યાંથી બીજે દિવસે વહેલી સવારે ફ્લાઈટ માં અમદાવાદ પરત ફર્યા……! વેકેશન ટુર પૂરી…!
    • સાથે યાત્રા કરતા નવા ચહેરા મળ્યા…મિત્રો બન્યા……ઓળખાણ વધી……મિત્રતા નો વ્યાપ ..પરિઘ મોટો થયો………!

    તો આ યાત્રા નો સાર-સુચન શું???

    • કોઈ પણ જગ્યા એ ફરવા જાઓ….એટલે દોડાદોડી ઓછી અને આરામ-શાંતિ વધુ- એ પ્રથમ વિચારવું……નહીતર વધુ જગ્યા જોવાની લ્હાય માં – યાત્રા ની મજા બગડી જાય…..!
    • હિમાલય યાત્રા કઠીન છે…..આથી શક્ય હોય તો બે ત્રણ એવા સ્થળ પકડવા કે જ્યાં – જીવ ની શાંતિ અનુભવાય….અર્થહીન- રાત્રી પ્રવાસ ને ટાળી શકાય……કુદરત ને માણો……જીવમાં ઉતારો……ભાગંભાગી ન કરો……! તમે ફરવા નીકળો છો…ખરીદી કરવા નહિ…તો એ મુજબ વર્તો…..!
    • ટુર એજન્સી કહે તેમાં થી ૭૦% જ સાચું માનવા નું….! સ્થળ બધા બતાવે…..પણ એ સ્થળ જોવા જવાના લોકલ ખર્ચા આપણે આપણા ખિસ્સા માં થી આપવા પડે છે…માટે ભરપુર કેશ રાખવી…….અને ત્યાની ટુરીઝમ વ્યવસ્થા આપણા પર નભે છે…આથી આપણ ને લુંટવા માં કઈ બાકી ન રાખે….! આથી ભાવતાલ કરો..ભરપુર કરો……ટેક્ષી થી લઈને ઘોડેસવારી- હોટલ બધામાં ખુબ ભાવતાલ થાય છે…..એડવેન્ચર ના નામ પર ઉઘાડી લુંટ ચાલે છે……આથી કોઈ જઈ આવ્યું હોય તો એની સલાહ લો…..જરૂર ન હોય તે ગેમ કે વસ્તુ ન ખરીદો……બસ ફરો…ફોટા પાડો..મજા કરો…!
    • જમવાનું- ત્યાં આગળ મોટા ભાગ ની હોટલ-રેસ્ટોરાં – વેજ અને નોન વેજ સાથે પીરસે છે…આથી સાવચેત રહો……રસોયો સાથે હોય તે એકદમ સારો ઓપ્શન તો નથી પણ – સાથે હોય તો સારો….નહીતર નાસ્તા કરી ચલાવવું પડે……માટે જોડે નાસ્તા લઇ જવા…..!
    • હિમાચલ પ્રદેશ ના આ સ્થળો એ ફરવા માટે – મેં-જુન સુધી જ સારો સમય કહેવાય …કારણ કે ઠંડી વેઠી શકાય તેવી હોય..બાકી ના દિવસો માં વાતાવરણ ના ઠેકાણા નહિ…દિવાળી વેકેશન માં પણ વાતાવરણ અને ઠંડી ની કોઈ ગેરંટી નહિ…..પણ સાથે સાથે – આ મહિનાઓ માં હોટલ- ફ્લાઈટ્સ-ટ્રેન બધું ભરચક હોય…..માટે લુંટાવું ન હોય તો એડવાન્સ માં બુકિંગ કરી ને જ જવું…..!

    ટૂંક માં- હિમાલય એ માત્ર યોગી-સંત-મહાત્મા ઓ નો જ નથી પણ આપણો પણ છે…..તેની સાચી મજા લેવી હોય તો જીવનમાં થી થોડોક વધુ સમય ચોરી ને લઇ લેવો……છેવટે- હિમાલય માં જીવવું- માણવું એટલે કે જીવન ને સમજવું…..! આવી યાત્રા અચૂક કરવી…પણ મેં ઉપર કહ્યું તેમ- દોડધામ કરી ને નહિ પણ – શાંતિ થી થાય ..એવી રીતે…!

    યાત્રા ના અઢળક ફોટા- મિત્રો માટે -ફેસબુક પર ટીંગાડવા માં આવ્યા છે………….બાકી તો- બસ-

    “મોજ માં રહેવું……મોજમાં રહેવું……મોજમાં રહેવું રે……

    હરિ મળ્યા ના કેફ માં રહેવું……મોજમાં રહેવું રે…….!!!”

    કાલ કોણે જોઈ છે??? એમ જ્ઞાન ધરાવતા હો તો- જીવન ને એક યાત્રા સમજી- બસ- ચાલતા રહેવું……મોજમાં રહેવું…!!

    રાજ


    Leave a comment

    જુના મિત્રો….યાદો નો ખજાનો….

    “……..જીવન માં મિત્રો કરવા કે દુશ્મન………દિલ થી કરવા અને જીવી જવા……..”


    બાકાયદા બક્ષી દા

    કોઈ તમને પૂછે કે તમે તમારા જીવન માં કુલ કેટલા માણસો ને મળ્યા હશો??? …….ઉત્તર લગભગ ન મળે……અને વળી બીજો પ્રશ્ન પૂછો કે …તમે જેટલા માણસો ને મળ્યા છો ..તેમાંથી કેટલા માણસો તમને યાદ છે…? તો કદાચ તેનો ઉત્તર મળી શકે…….અને એ યાદ રહી ગયેલા વ્યક્તિઓ માં થી મિત્રતા …કેટલા સાથે તો- તમને કદાચ તેનો ઉત્તર સહેલો પડે……..અને જો ગાઢ મિત્રો ની વાત થાય તો- આંગળી ને વેઢે ગણી શકાય …એવી સ્થિતિ થાય…….!! મારી સમગ્ર જિંદગી માર્કેટિંગ ક્ષેત્ર માં જ ગઈ છે…અને હું કેટલા વ્યક્તિઓ ને જીવન માં મળ્યો હોઈશ……કદાચ હજારો માં હશે…..પણ મિત્રો નું લીસ્ટ બનાવું તો જીવન નો આ પરથારો કદાચ ટૂંકો પડે……! ભગવાન ની કૃપા એ મને અઢળક મિત્રો મળ્યા છે……! કોઈક ફિલસુફે સાચું જ કહ્યું છે કે……

    ” કોઈ વ્યક્તિ એના જીવન માં કેટલી સફળ છે…….એ જોવું હોય તો એના મિત્રો જોઈ લેવા….”

    અને એ જ તો છે જિંદગીની ફલશ્રુતિ કે ” સફર ચલતા રહા…લોગ મિલતે ગયે ઔર કારવાં બનતા ગયા……”…! મિત્રો બનાવવા -હોવા એ કદાચ હૃદય ફાડી ને જીવાતી વાત છે…..કોઈ ને પોતાના અંતર ની વાત કહી શકો……અડધી રાત્રે ફોન કરી તું-તારી કરી ધમકાવી શકો…….એને ખોટું લાગે છતાં એને મનભરી છેડી શકો……..લડી શકો…….એની સલાહો….સૂચનો..ફરિયાદો…ને મનમૂકી ને જીવ શકો….એ જ તો મિત્રતા છે…..!

    અને હું નસીબદાર છું કે – મારા કોઈ દુશ્મન જ નથી……બધા મિત્રો જ મળ્યા છે…..અને એવા કે આટલી ઉમરે મને બાકાયદા ખુલ્લેઆમ ધમકાવીને વાત કરી શકે…….! મારું બાળપણ ભિલોડામાં ગયું……સરકારી સ્કુલ માં ભણ્યા…..સેકન્ડરી સ્કુલ શ્રી નવીબાઈ રામજી આશર વિદ્યાલય માં અને હાયર સેકન્ડરી આણંદ ની શ્રી દાદાભાઈ નવરોજી સ્કુલ માં ગયા…….! SSC માં જે મિત્રો સાથે હતા તેમાં થી મોટાભાગ ના છેક પહેલા ધોરણ થી સાથે જ હતા પણ ત્યારબાદ કાળક્રમે જીવન ની ઘટમાળ માં બધા ખોવાતા ગયા…..કેટલાક મિત્રો નો સંપર્ક રહ્યો…..પણ અલપઝલપ ……! પણ મિત્ર અમિત ભટ્ટ ના ઉત્સાહ…..રાતદિવસ ના દાખડા થી એ સમય ના જુના મિત્રો ફરીથી સોશિયલ માધ્યમ ની મદદ થી એકસાથે થયા…….દિલ બાગ બાગ થઇ ગયું……….હૃદય જૂની યાદો થી ભરાઈ ગયું……અને બધા નો ઉત્સાહ ઉમળકો એવો કે રૂબરૂ મળીએ……સમય ના એ વીતી ગયેલા પ્રવાહ માં એકબીજાને શોધીએ ..એ માટે પ્રયત્નો કરવા ની વાત આવી……અમિત હૃદય થી મંડી પડ્યો…….બધા અત્યારે ક્યાં હોય…..સમય હોય ન હોય……ક્યારે મળી શકાય એ બધા પ્રશ્નો નો ઉત્તર મળતો ગયો અને અનેક પ્રતિકુળતા વચ્ચે પણ એકબીજાને મળવા ની તીવ્ર ઈચ્છા થી ગયા રવિવારે – અમારી સ્કુલ ના એજ પ્રાંગણ માં પરિવાર સાથે મળવા નું ગોઠવાયું…….મારું કઈ નક્કી નહોતું કારણ કે- અમુક આયોજન એવી રીતે ગોઠવાયેલા હતા…..છતાં રીના ન આવી શકી અને હું એકલો મિત્રોને મળી આવ્યો. ઘણા મિત્રો ન આવી શક્યા…..પણ જે આવ્યા હતા તે છેક મુંબઈ..વેરાવળ…..બરોડા…ભરૂચ…….કોટા……જેવા દુર દુર ના સ્થળો થી આવ્યા હતા……! એના પર થી જ સમજાય કે મિત્રો નો ઉત્સાહ કેવો હતો……!

    બધા મિત્રો અત્યારે તો જીવન માં સારી રીતે સ્થિર થઇ ગયા છે……સંતાનો પણ મોટા થઇ સારો અભ્યાસ કરી રહ્યા છે…….સમયે એનું કામ કર્યું છે…..ઘણા બદલાઈ ગયા છે…….તો ઘણા એવાને એવા જ છે…………બધા મળ્યા.અને એટલો આનદ થયો કે સમય નો માર એ આનંદમાં ……હંસીખુશીમાં ધોવાઈ ગયો…….!…સ્કુલ ના પ્રાંગણ માં -ફર્યા…..સ્કુલ ના હાલ ના સંચાલકો મળ્યા…..એમને પણ એ વાત જાણીને આનંદ થયો કે અમે લગભગ ૨૫ વર્ષ બાદ મળી રહ્યા છીએ…….! પછી તો નજીક ના એક રેસ્ટોરન્ટમાં – ભિલોડામાં રહેતા મિત્રો એ અગાઉ થી જ આયોજન કર્યું હતું તેમ બધા એ ખુબ એન્જોય કર્યું……વાતો કરી…સાથે જમ્યા……..રમ્યા………!!!

    ખુબ જ મજા આવી………અને આનંદ એ વાત નો થયો કે- વરસો ભલેને વીતે પણ મિત્રતા અકબંધ રહે છે……બધાને રોજબરોજ તો રૂબરૂ ન મળી શકાય પણ ફેસબુક-વોટ્સેપ જેવા માધ્યમ થી સતત સંપર્ક માં રહી ને પણ દોસ્તી નો ગુલાલ કરી શકાય છે………!

    તો મિત્રો……..- મારા ગુરુ બ્રહ્મસ્વરૂપ પ્રમુખ સ્વામી મહારાજ કહેતા કે – વિજ્ઞાન નો જો સદુપયોગ થાય તો વરદાન છે અને દુરુપયોગ થાય તો અભિશ્રાપ …….એમ અમારા કિસ્સા માં અમને વિજ્ઞાન નો સદુપયોગ ફળ્યો છે…….જુના મિત્રો……એમની યાદો……આટલા વર્ષો પછી પણ તરોતાઝા ..મઘમઘતી રાખવા નો મોકો મળ્યો છે……સત્સંગની સાથે સાથે સબંધ પણ જળવાઈ રહે તેવું ગોઠવાયું છે………

    તો- કહેવાનું એટલું જ છે કે- જીવન નો કોઈ ભરોસો નથી…….કાલે શું થશે એ ખબર નથી…….અહી તો રાત ટૂંકી અને વેશ ઝાઝા છે…….અને એવામાં કોઈ પોતાનું મળે તો -મધદરિયે તરાપો મળ્યા નું સુખ થાય…….માટે બસ- જે પલ મળી……જે ક્ષણ આવી એમાં બસ..જીવી જવું………સ્વાર્થ ના વિચારો છોડી ક્યારેક અંતર ના સુખ નું એ વિચારવું…….! સારા મિત્રો- કઈ એમને એમ નથી મળતા….એ તો અનેક જન્મ ના પુણ્ય તપતા હોય ત્યારે એ ઋણાનુબંધ બંધાય છે……!

    ચાલો મિત્રતા ના એ ઉત્સવને જીવી જઈએ………!!!

    રાજ